Den reparticion di cartera pa Gabinete Wever Croes II, Enseñansa pa Empleo a bin resorta bek bou di Ministerio di Labor. Durante Gabinete Wever Croes I el a resorta bou di Ministerio di Enseñansa. Y apesar cu e Minister di e tempo aya tabatin su propio vision pa EPE, Minister Glenbert Croes ta contento cu e departamento aki ta bek bou di Ministerio di Labor specialmente den cuadro di ARUBA KIER TRAHA cu ta e plataforma encarga pa cu recapacitacion di nos hendenan cu tabata riba FASE. Na mes momento Aruba Kier Traha ta e puente di comunicacion entre gremionan y departamentonan di Gobierno pa sigura cu e cursonan duna, ta cumpli cu e demanda Laboral, pa DPL na su turno yuda nos hendenan cu un trabou.
Historia breve di EPE:
Enseñansa pa Empleo (EPE) a wordo funda na aña 1988. Despues cu Lago a cera su portanan na 1985, hopi hende a perde trabou y e gobierno di Aruba e tempo ey a busca un alternativa pa Aruba su economia na unda e industria di hotelero y turismo a forma y a crea oportunidad pa trabou. Gobierno a bin cu e proyecto pa ‘her- en bijscholing’ di e hendenan cu no tabatin trabou, haya curso pa un ofishi nobo, entre otro den custruccion y hotelero. Asina Enseñansa pa Empleo a nace y a bira e centro di enseñansa desde e tempo ey cu ta ofrece curso cu por uza den e mercado laboral.
Pues pa e mandatario ta cu hopi orguyo ta anuncia cu Enseñansa pa Empleo ta habri bek inscripcion pa cursonan den e prome periodo di 2022.
Inscripcion lo ta online via e website di EpE: www.epearuba.com. E ultimo dia pa inscripcion ta 31 di januari 2022. Cursonan lo cuminsa den e prome siman di februari.
Tarifa socialisa:
Ta importante menciona cu Minister Glenbert Croes a opta pa mantene e tarifanan socialisa pa asina e por ta accesibel y pues pagabel pa tur hende.
E variedad di cursonan cu Enseñansa pa Empleo ta ofrece grandi variando for di diferente idiomanan, Office Skills, Boekhouden, Waiter, Bartender te Sales & Marketing. Lista di tur e cursonan como tambe e tarifanan ta publica riba e website www.epearuba.com den e seccion di “Rooster di Curso EPE”.
Enseñansa pa Empleo tin comprension pa esun cu pa un of otro motibo no tin acesso na computer/internet pa haci e inscripcion online, pa cual motibo ta brinda e oportunidad pa inscribi personalmente na EpE. Orario di inscripcion personal ta entre 8.30 -11.30 y 13.00-16.00 na e oficina di EpE situa na Engelandstraat 33.
