Segun Parlamentario Jennifer Arends-Reyes tin varios factor cu mester traha riba nan conhunto den un Pais prome cu e cambionan proponi por cosecha exito. Sra Arends-Reyes a bin ta entregando varios mocion desde cu el a drenta Parlamento cu ta crea proyectonan sostenibel pa stimula na final mas oportunidad pa specialmente nos mucha y hobennan ta exitoso den bida. Si cuminsa na un mocion pa urgi gobierno pa traha diligentemente riba un concepto di ley pa centronan di cuido di mucha, awe den 2016 e concepto di ley aki a bira un realidad y ta na Parlamento pa ser trata. E concepto di ley aki ta un di e recommendacionan di Unicef pa pais Aruba y den luz di celebracion di dia Internacional di derecho di mucha dia 20 di November por bisa cu Pais Aruba ta mas cerca di e ley aki cu aña pasa y e ley aki mester percura pa trece mas structura den e rekisitonan y siguridad pa un centro di cuido di mucha, brindando asina mas proteccion na nos ciudadanonan di mas chikito den nos comunidad. Un otro mocion cu a yega di ser presenta ta esun pa urgi gobierno pa bin cu un Mavo, Havo y eventual VWO nobo pa brinda mas oportunidad pa nos hobennan cu locual tin caba existente. Durante tratamento di presupuesto 2017 a bolbe haci pregunta y follow up ariba e topico aki y tin plannan pa ehecuta e idea di un Mavo, Havo na Noord. Un otro mocion cu a ser treci dilanti durante tratamento di presupuesto 2017 ta esun cu ta urgi Gobierno pa haci un sondeo pa amplia e ley di Enseñansa obligatorio cu e exigencia pa pidi un cualificacion inicial ‘start kwalificatie’ pa nos hobennan te cu 18 aña. Esaki lo por yuda combati e parti di drop-outs y lo yuda cu un miho preparacion di nos hobennan prome cu nan drenta mercado laboral y consecuentemente crea mihor mobilidad social den nos comunidad. Un grupo cu semper Sra Arends-Reyes tambe a kere aden ta nos graduadonan di medicina den region, cu te ainda tin un caminda particularmente largo pa cana prome cu nan por cumpli cu e registracion cu nos Pais, como parti di reino Hulandes ta exihi di nos mediconan profesional. Awe e grupo aki tin despues cu a entrega un mocion na 2015 un opcion pa aplica pa un extension den nan fiansa pa estudio di gobierno pa sigui nan estudio na Europa. Algo cu den pasado no tabata posibel y cu financieramemte tabata cay full na e capacidad di famia di graduadonan si nan ta sigui studia of no. Un otro mocion cu a mira luz di dia y a wordo realisa ta e vacaturebank online cu lo mester duna acceso specialmente na e profesionalnan hoben cu ta den exterior un bista di e vacaturanan cu Aruba tin di ofrece pa asina nan por wordo stimula pa bin bek traha na Aruba y contra aresta e fenomeno di brain drain cu ta cu e conocimento adkeri door di nos yiunan di tera ta keda den exterior. Durante tratamento di presupuesto di 2017 sra Arends-Reyes a haci entrega di un mocion cu ta pidi pa sondea e posibilidad di habri e opcion pa Aruba brinda un tipo di fiansa pa estudio pa e-learning, pues pa sigui un estudio online for di algun universidad acredita y cu Aruba ta reconoce su diploma tambe. Brindando asina mas oportunidad na un grupo mas grandi di personanan cu ta desea di sigui un estudio. Asina den e linea aki enseñansa, oportunidadnan, labor y innovacion tin cu bay man den man pa sigura cu nos mucha, hoben y profesionalnan ta parti di un Pais cu ta stimula progreso, oportunidadnan y pa ta parti di un comunidad exitoso sra Arends-Reyes ta termina bisando.