Sra Arends-Reyes tabata tin 10 aña di experiencia di trabou na Colegio Arubano y 4 aña na Hulanda prome cu e la drenta arena politico. Durante 4 aña di Parlamento ta diferente mocion su persona a presenta na beneficio di entre otro muchanan y hobennan. Awe cu ta aña di eleccion por tuma nota cu diferente partido politico y politiconan ta trece nan vision pa Enseñansa. Mester bisa cu hopi ta enfoka ariba tools y uzo di tecnologia pero e realidad ta cu tin hopi trabou ainda pa hasi den Enseñansa y tecnologia lo ta un parti pero no tur cos ora ta papia di e cambionan ainda cu falta pa Aruba. Sigur tin espacio pa tur plan awo pero e realidad ta cu ta hopi a ser inverti den Enseñansa pa aña, si por ta exacto mas cu 270 miyon pa aña cu ta 20% di nos presupuesto total y cu ta hiba nos na top 3 di mundo den parti di percentahe cu ta inverti den Enseñansa. Cualificacion inicial y aumento di edad di Enseñansa obligatorio ta un punto cu semper sra Arends-Reyes a trece dilanti mirando cu e lo ta e siguiente paso den locual nos tin actual. Summer school lo mester bira un concepto normal na Aruba caminda cu ta duna un ultimo chens pa pasa un vak pa asina evita e fenomeno di ‘keda sinta’, perde full un aña y baha e mucha of hoben su auto -estima. Esaki lo mester bai man den man cu mas guia y remediëring den klas mes cu ayudo cu klassen assistent. Diagnostico na tempo y e trahado socialnan mester ta cerca di e scolnan pa reinforsa e trabou di maestronan. Cluster 2 pa muchanan cu un of otro discapacidad manera problema di oido mester wordo reenforsa. Muchanan cu tin autismo lo mester por haña mas recurso y mester sigui cu e convenio cu a wordo firma pa explora e posibilidadnan pa Aruba. Scolnan cu ta uza e metodo di Montessori lo mester wordo observa di serca pa wak kiko lo por siña di nan pa muchanan cu no por logra den Enseñansa tradicional. Habri e scolnan despues di 1:30 pa ofrece actividadnan extra curricular y traha cu diferente Ministerio pa logra pa esaki ta exitoso y contribui na formacion di e generacion nobo. Introduci un meldcode uniforme pa tur persona cu ta traha cu mucha y hoben. Tambe sigui cu un maneho di droga estricto pa droga keda leu di scolnan. Entre otro Alimentacion, nutricion, amor pa bestia y naturaleza y e balor di sostenibilidad lo mester ta un parti integral di Enseñansa pa e proximo añanan. Nos studiantenan den region, Norte America y Hulanda tambe lo mester sinti cu aunque nan ta leu Aruba ta keda serca sea ta via Aruba Huis of otro personan designa pa duna nan un servicio di calidad. Preparacion y traha estrecho cu e demanda di nos mercado laboral mester keda algo pa traha riba dj’e. Maestronan lo mester bai traha cu gana na skol y sigui brinda nan e facilidadnan y oido pa asina nos sigui hiba nos futuro generacionnan dilanti sra Arends-Reyes ta termina bisando.