E investigadonan di Fuse, e Centro di Investigacion Tranlacional den Salud Publico di e Universidad di Newcastle y e Universidad di Teesside, a alerta cu energy drinks (bebida energetico) ta asocia cu un mayor riesgo di problema di salud mental entre e mucha y hoben.
E hallazgonan
Segun e estudio nobo, caminda cu a analisa dato di 57 investigacion cu a atende un muestra di mas di 1,2 miyon mucha y hoben di mas di 21 pais, e investigadonan a haya cu e consumo di bebida energetico por provoca ansiedad, stress, depresion y pensamento suicida. Tambe, nan a señala cu su consumo tabata mas comun entre e mucha hombernan compara cu e mucha muhenan y tambe a asocia cu un aumento di conducta di riesgo como e uzo di substancia, violencia y e relacionnan sexual sin proteccion.
Tambe nan a vincula e consumo di bebida cu un mayor riesgo di rendimento abao academico, problema di soño y custumber di alimentacion poco saludabel. E expertonan a resalta e necesidad di tuma medida regulatorio pa restringi e benta y comercialisacion di bebida energetico na mucha y hoben.
“E bebidanan energetico ta comercialisa entre mucha y hoben como un forma di mehora e energia y e rendimento, pero nos hallazgonan ta indica cu en realidad nan ta haciendo mas daño cu bon,” Amelia Lake, profesor di Nutricion di Salud Publico di Fuse y autor principal di e studio, a splica. “E evidencia cu e bebidanan energetico ta perhudicial p’e salud fisico y mental di mucha y hoben, como tambe pa nan comportacion y educacion ta cla. Nos mester tuma medida awo pa proteha nan di e riesgonan aki,” el a añadi.
Cafeina den exceso
E Agencia di Norma Alimentario di Reino Uni ta establece cu e bebidanan energetico generalmente tin nivel halto di cafeina y ta diferente n’e “bebidanan deportivo” cu por uza pa reemplasa e electrolitonan perdi durante ehercicio. E nivelnan di cafeina den un bleki por varia entre 80 mg (ekivalente na dos bleki di cola of un cup di koffie instantaneo) y 200 mg (ekivalente na cinco bleki di cola).
Preocupacion importante di salud publico
“Nos ta profundamente preocupa p’e hallazgonan cu e bebidanan energetico por provoca angustia psicologico y problema di salud mental,” dr. Shelina Visram, profesor titular di Salud Publico di Fuse y co-autor di e investigacion, a comenta.
“Tabatin inaccion politico den e ara aki, a pesar di e preocupacion di e gobierno y e consultanan publico. Ta ora pa nos tuma medida den e sector di crecemento mas rapido riba e mercado di refresco,” el a agrega.
Desde un investigacion similar realisa na 2017, e academiconan a pidi e gobierno di Reino Uni pa tuma medida riba e benta di bebida energetico na menor di 16 aña, despues di descubri cu nan tabata bende nan n’e hobennan na un prijs mas abao compara cu awa na boter. Tambe a yama atencion cu dicho bebidanan tabata hopi accesibel n’e menornan di edad y fuertemente promociona mediante anuncio online, wega riba computer, television y patrocinio deportivo.
Di e mesun manera, e investigacionnan anterior tambe a conclui cu te hasta un tercio di e muchanan di Reino Uni ta consumi bebida energetico cu cafeina tur siman. A haya cu e poblacion hubenil di e pais tabata e mayor consumidor di bebida energetico na Europa pa nan grupo di edad. Despues di e campaña nacional aki, hopi supermercado grandi di Reino Uni a bay di acuerdo pa prohibi benta di bebida energetico na mucha. E estudio a wordo publica recientemente den e revista Public Health. William Roberts, director ehecutivo di Royal Society for Public Health, a expone cu “e revision importante aki ta agrega n’e creciente evidencia cu e bebidanan energetico por ta perhudicial p’e salud fisico y mental di mucha y hoben, tanto corto como largo plaso.”
