Como cu no a haña contesta den 4 luna lo aserca ARA pa pa traha un rapport alrespecto
Parlamentario Endy Croes a bolbe enfatisa e tema di ATA e siman aki durante conferencia di prensa. No obstante cu a splica anteriormente cu Presidente di Board Marieta Ras suegra di Mike De Meza a firma namens Board un suma di 810 mil florin pa sponsor ruman di Mike Eman pa cumpra un auto di careda Parlamentario kier a aclaria esaki mas den detayes. Un email a drenta 24 di Juni 2018 cu dicho peticion unda esaki a wordo aproba pa Board 2 di Juli 2018. Segun Parlamentario Endy Croes den e “committment” ATA ta verwijs na artikel 21 di LV AB 2011 no 14 cual ta e Ley di Aruba Tourism Authority. E artikel aki ta splica cu “ Aanbestedingsregels die gelden voor het Land Aruba zijn van overeenkomstige toepassing voor ATA”. Pues e ley di comptabilidad cu ta rigi pa Land Aruba ta vigente pa ATA . Kico e Ley di comptabilidad ta stipula? Artikel 25 di dicho Lei ta splika” Een werk, een levering of een dienstverrichting waarvan de geraamde kosten Afl.100.000,- of meer bedragen, wordt slechts toegewezen, nadat daartoe een openbare aanbesteding is gehouden”. Akinan caba Parlamentario Croes tin su preguntanan. Tin mas auto cu a core na USA como 10 aña refiriendo na The Bull y esaki apenas a ricibi $1200 dollar for di ATA ultimo 8 añanan. Pues cu cual midi ta wordo midi e ora? Pasobra ta ruman di Mike Eman?
Croes a bin cu prueba dilanti splicando cu desde 30 di november 2017 el a manda preguntanan oficial via Staten pa ATA. Ta trata di 6 pregunta tur basa riba e auto di careda aki. Mester bisa cu a dura casi 3 luna pa ta exacto 20 di februari 2018 pa ricibi e contestanan unda ATA a confirma cu ruman di Mike Eman a ricibi 1.6 MIYON florin for di ATA pa e auto di careda y ATA a confirma tambe cu AAA tambe ta sponsor e auto aki. Parlamentario Croes a mustra cu prueba di articulonan cu a sali den prensa den luna di Februari unda personalmente a manda pidi minister Oduber pa no continua cu e contracto aki den 2018. Un di e rasonan ta cu pista di Palo Marga ta den deterioro y mester percura pa esaki prome y di dos sigur mester tene cuenta cu nos ta den un Crisis. Minister Oduber ta confirma cu el a avisa Directora di ATA riba e decision aki. No obstante esaki ATA a tuma un decision contrario na e vision di e Minister. Artikel 10 di Lei di ATA AB 2011 no 14 ta ilustra hopi cla na letter b, “ de strategie die moet leiden tot het realiseren van de doelstellingen van de rechtspersoon ( ATA) en van de prioriteiten die daarbinnen door de Minister zijn bepaald voor de uittvoering van het toerismebeleid”. Pues klaramente no a respeta prioridadnan di e Minister concerni. Parlamentario Croes finalisando ta splika cu desde 20 di Maart 2018 el a haci 41 pregunta oficial via Staten di Aruba na ATA pero lamentablemente te cu awe no a ricibi contesta riba esakinan. Esaki ta conduci cu como Parlamentario e mester uza otro “tools” cu Parlamento tin esta involucra ARA ( Algemene Rekenkamer Arunba) pa por skirbi un rapport riba ATA y asina finalmente logra yega na contestanan pa cu preocupacionnan cu tin.