E encuestadornan di Banco Central lo bishita solamente 1400 cas. Sr. Jonathan Upegui ta splica e motibo tras di esaki.
Banco Central a haci un ehempel econometrico cu ta wak cu bo por duna un contesta confiabel cu ora bo bishita e 1400 casnan aki, bo por papia pa Aruba completo. Pa un encuesta online, no tur hogar na Aruba, of no ta sigur si tur hogar na Aruba tin acceso pa internet of sa con pa yena un encuesta online.
E encuestadonan lo bay guia pregunta pa pregunta y splica tambe kico e pregunta kiermen. Cada hende ta interpreta na manera diferente y esey por trece un bias den bo contestanan. Door di maneha esaki y bay di cas pa cas, cu e encuestado ta guia e encuesta bo sa sigur cu loke bo por duna bo analisis ta bay de facto ariba loke bo a puntra.
Aruba tin mas di 30 mil adres registra y e 1400 ta representativo pa Aruba. Banco Central a pidi cooperacion di CBS cu tin e plan aki y nan a traha e samplenan, y nan a dicidi e adresnan. Hopi otro encuestadonan ta haci uzo di e strategia aki. Durante e encuesta, no ta bay exclui ningun hogar na e pais. E encuestado no ta registra e adres, pero no mas e region.
Sr. Upegui a sigui bisa cu door cu e ta un encuesta di hogar, ta pone tur entradanan hunto y ta pone tambe tur e gastonan di tur hende den e hogar. Pero tambe pa tin e papelnan, pa bo sa cuanto bo fiansa ta pa luna, cuanto e tabata na comienso, cuanto falta pa paga ainda. Pero tambe si bo tin un seguro di bida, cuanto e pago ta na final. Dus e ta echt pa wak kico e activonan ta di cada hogar.
Via e conferencia di prensa, Banco Central ta duna un notificacion general na e pueblo pa nan ta prepara pa esaki. E encuestadonan lo pasa mas tanto den weekend, of den oranan di atardi. Gran parti di e poblacion ta traha y nan ta na cas den oranan di merdia. Si nan yega na un adres cu no tin hende na cas, ta laga un carta den e postbus cu su number di telefon y si e persona di e cas por contacta e encuestado.
E encuesta ta tuma 7 siman, dus no ta spera cu e encuestadonan ta cuminsa diasabra y haya tur hende cu nan tin ariba nan lista e mesun dia.
Tur hende por prepara, pero ta 1400 cas so lo wordo bishta, segun Sr. Jonathan Upegui di Banco Central.