Di dia 2 te cu 29 di November 2016 Departamento di Labor y Investigacion (DAO) lo tene su di seis Encuesta di Forsa Laboral (EFL). E EFL 2016 lo tuma luga den cooperacion cu e Oficina Central di Estadistica (CBS), como tambe di Banco Central di Aruba (CBA). E EFL 2016 tin como meta forma un imagen actual y completo di e mercado laboral di Aruba. Un meta importante di e EFL 2016 ta e midimento di e cifra di desempleo na Aruba. Pa medio di e informacion colecta tambe lo determina otro caracteristica y indicadornan importante di e mercado laboral cu ta necesario pa un analisis mas profundo di e mercado laboral, manera e.o. e grado di participacion y e nivel di educacion di e trahadornan. E dato y e tendecianan señala lo sirbi esnan cu ta stipula maneho, gobernante, investigado y empresarionan pa mehora y refina nan maneho pa cu e mercado laboral.
Participacion
Pa e EFL 2016 a scoge un muestra di adresnan reparti riba henter Aruba. Si bo adres a cay den e adresnan scogi, nos ta pidi bo cordialmente pa duna bo colaboracion na nos encuestador. Den e encuesta aki solamente esnan di 15 aña bay ariba lo ser entrevista y pa esaki no ta importa si e persona ta traha of no. Pa medio di e cuestionario bo lo contesta algun pregunta riba bo situacion actual riba e mercado laboral.
E encuestadornan lo bishita e adresnan selecta di dialuna pa diadomingo entre 8.00 a.m. y 8.00 p.m.. E encuestadornan lo identifica nan mes cu un badge special di DAO y nan lo bisti un polo shirt cora. Den caso cu no tin ningun hende na cas, e encuestador lo laga un carta atras cu su number di telefon. Nos ta pidi bo pa por fabor tuma contacto mas liher cu ta posibel cu e encuestador pa traha un cita cune. Tambe bo por yama DAO pa asina traha un cita.
Privacidad
Tur informacion lo ser procesa anonimamente y lo ser publica solamente den forma agrega. Bo privacidad ta ser garantisa pa Departamento di Labor y Investigacion. Bo informacion lo contribui na mehora e bista riba desaroyonan den e mercado laboral di Aruba. Pesey bo participacion na e EFL 2016 ta esencial.
Nos ta gradici bo di antemano pa bo participacion na e EFL 2016. Pa mas informacion riba e Encuesta di Forsa Laboral 2016, bo por tuma contacto cu number di telefon 583-7720 y puntra pa un di e trahadornan di e Oficina di Investigacion di Mercado Laboral (Bureau Arbeidsmarktonderzoek).