Dialuna anochi ta tuma luga un encuentro informativo pa studiantenan cu ta bayendo, of tin intencion di bay studia na Hulanda. E encuentro aki ta organisa pa Arubahuis, Departamento di Enseñansa y Ministerio di Enseñansa, Ciencia y Desaroyo Sostenibel. Durante e encuentro varios orador lo hiba palabra pa asina percura pa e e studiantenan y mayornan ta completamente informa di e proceso di preparacion pa studia y biba na Hulanda. Minister Plenipotenciario lo hiba palabra pa informa tur presente di e asistencia y sosten cu Arubahuis por brinda na nos studiantenan. Mas cu claro lo tin espacio pa scucha di mayornan y studiantenan den ki forma Arubahuis por mehora nan servicio na nos studiantenan.
E encuentro ta tuma luga dialuna anochi 7or den auditorio di Colegio EPI. Por registra pa e encuentro riba e pagina di Eventbrite. E link pa registracion ta disponibel tambe riba e pagina di Facebook di Arubahuis y Departamento di Enseñansa di Aruba.