Conferencia Green Aruba ta tras di lomba y e invitadonan cu a bin aki pa atende e evento tambe a regresa nan pais. Asina ta e caso di Robert de Leeuw, embahador di Reino na Republica Dominicana. Despues di dos dia di conferencia de Leeuw a bisa di a keda masha impresiona di e forma con Aruba kier yega na un sociedad sostenibel. “Aruba ta un bon ehempel pa e region. Tur e paisnan di e region ta trahando duro riba sostenibilidad, tambe e pais unda mi ta staciona. Republica Dominicana ta en busca di ehempelnan y manera Prome Minister Eman a bisa ‘esaki ta producto di exportacion y nos ta trata di ta e ehempel pa otronan.”
Embahador de Leeuw ta sigur cu Aruba ta hopi bon bezig pa ta e ehempel pa paisnan den region. Pa loke ta reapertura di e refineria de Leeuw a bisa cu topiconan asina semper ta keda dicifil pa haci e miho escogencia. ” E refineria ta bon pa e economia di e isla, pa empleo pa e habitantenan y ta un arte pa haya e balansa entre rendimento economico y logro di e metanan bo dilanti den cuadro di sostenibilidad. Esey ta e reto. Si Aruba logra loke e kier logra riba e tereno aki, esaki ta bira un concepto cu ta wordo braza pa hopi otro pais.” De Leeuw a bisa cu den caso di sostenibilidad mester wak su rendimento a termino largo. “E ta bon pa salud di e hendenan, bon pa naturalesa, e ta atrae un otro sorto di turista y como isla Aruba mester distingui su mes di otro paisnan pa mira con atrae e publico cu ta aprecia sostenibilidad.”
Pa loke ta e meta cu Aruba a pone su dilanti pa na 2020 ta independiente di petroleo fosil e embahador ta bisa di tin confiansa cu Aruba ta logra esaki, sigur despues di a tende kico tur a wordo bisa, discuti y haci caba. “E gana tey y pa logra e meta bo mester ayudo di e comunidad, mester bay en busca di e balansa necesario entre desaroyo economico y e meta bo dilanti. Tres aña ta cortico, pero e determinacion tey pa riba un termino corto ta independiente di petroleo fosil. Di tur forma mi por bisa cu Aruba ta riba e bon caminda.”