Tur aña riba 14 di november ta conmemora e “World Diabetes Day” y en conexion cu e celebracion mundial, Aruba e aña aki ta celebra esaki cu entre otro un caminata di 4.5 kilometer. Riba diadomingo dia 13 di November 2016, Botica di Servicio hunto cu IBiSA ta organisa e caminata cu e lema “Eyes on Diabetes”, cual ta e lema scogi pa e organisacion mundial e aña aki pa conscientisa riba e enfermedad di diabetes.
E caminata di 4.5K ta cuminsa pa 6’or di mainta na Sport Centrum IBiSA na San Nicolas, situa na Dr. Schaepmanstraat 52 y ta finalisa bek na Sport Centrum. Participacion na e “Fun Walk” ta COMPLETAMENTE GRATIS pa cual Botica di Servicio hunto cu IBiSA ta invita nos comunidad pa bin y participa na e caminata. Unico rekisito cu ta wordo pidi, ta pa e participantenan por bin cu un T-Shirt color blauw bisti, energia, hopi animo y alegria pa hunto demostra cu Aruba tambe tin su ‘BISTA riba Diabetes’.