Empowerment Queen ta un plataforma digital pa hende muher, cu tin como meta pa empodera hende muhe cu mensahenan y encuentronan positivo. Trahado social y lider di e proyecto, Nicole Godett, ta publica contenido den forma di video, quotes y discusion sano, pa encurasha e hende muhe pa refleha riba su mindset, traha riba su amor propio y salud emocional.
Den cuadro di e metanan aki, Empowerment Queen a organisa un encuentro ameno pa hende muhe na unda cu a traha riba un proyecto creativo. Renata Sierra di Naty Letters a duna un workshop basico di Hand Lettering.
E pensamento tras di e actividad, segun Empowerment Queen, ta pa crea momentonan na unda hende muhe por brinda nan mes un momento di relahacion, stimula nan mente creativo y comparti pensamentonan cu otro ser femenino. Cada participante a scoge un afirmacion pa skirbi segun e stilistica di Hand Lettering y a logra esaki cu e guia di e instructor.
Empowerment Queen kier inspira cada hende muhe pa cuida nan mes den tur aspecto y sentido. Pone meta nan dilanti y triunfa. Manera Nicole sa bisa: “Chin up, Fix your crown & Slay!”Pa mas informacion, Naty Letters ta activo riba social media cu bunita obranan di arte original.
Empowerment Queen ta activo riba Facebook y Instagram, na unda por sigi tursu videonan, por intercambia pensamento y haya sa ora cu tin mas evento