NORTH CAROLINA, Merca- Dos empleado di e crèche Pleasant Hill Baptist Church Day Care den e localidad di Elkin, North Carolina a wordo kita di trabao. Motibo di esaki ta cu nan ta wordo acusa di a tape un mucha muhe di 17 luna su sapatonan na su pia. Esaki segun Newsweek.
Jessica Hayes, e mama di e mucha, dia 16 di mei a publica riba Facebook e pianan di su yiu cu e sapatonan getape, como tambe imagennan cu tabata mustra pia di e criatura tur hincha.
“Un hende mas ta wak e problema di esaki? Of ami ta unico?” Hayes a skirbi bou di e potret. “E ta dolor ora cu nan ta caba cu e confiansa cu a wordo deposita den dos persona cu a cuida di mi yiu, desde cu e tabata tin 6 siman. Nan a pega e sapatonan na su pia door di pega tape na su enkel. Y nan a lag’e tempo suficiente como pa lag’e marca, hincha y blauw”, e mama di e criatura a skirbi.
Hayes a agrega cu el a acudi na e directora di e creche, Maehsell Marley, kende a sigura e mama cu el a keda asombra door di e situacion. Den un declaracion despues, Marley a confirma cu ambos empleado a wordo kita di biaha for di trabao.
Mientras tanto, Hayes, mama soltera no tin otro opcion aworaki di laga su yiu na e mesun crèche, pero ta pensa di kit’e di eynan pronto. Esaki ta debi na e falta di apoyo di parti di otro mayornan desde cu el a post e potretnan. Si e mama a delete e potretnan for di su rednan social.
Fuente: https://actualidad.rt.com