Dialuna mainta empleadonan di SABA a sali cu accion pa motibo di problema cu directiva cu no kier paga nan e Bashi Premie, y ta bin cu condicion pa paga esaki segun Rodrigo Tromp, bewaker na SABA ta splica. Un di e condicionnan ta cu nan lo kita 6 pa 7 ATV dag pa asina por paga e Bashi Premie.
“Remarcabel ta cu nos tin un CAO y unilateralmente e dunado di trabao no por djis tuma un decision asina, e tin cu sinta cu trahadonan, yega na un acuerdo,” segun sr. Tromp. Mayoria di empleadonan a opta pa entrega 5% di salario den conexion cu bahamento di gasto por medio di e pandemia. Den ultimo reunion cu sindicato actual ABV, a trece dilanti cu SABA kier tur tres premie y empleadonan mester escohe entre e tres premie of 5%. “E ta logico cu mayoria di hende a bisa cu lo entrega 5%, pero aworaki a bin na banda cu si nos lo haya bashi premie, mester entrega 6 of 7 dia di ATV tambe y nos no ta di acuerdo.”
Dos opcion e empleadonan tin pa SABA: Mita premie, of 5% di salario, e empleadonan no kier entrega nada mas, nan no kier pa nan pishi cu dianan ATV ni tampoco vacantie uitkering. Sr Tromp ta bisa cu SABA ta uzando ABV pa laba nan man y laga ABV haci e trabao sushi. “ABV mester a bin cu un reunion y nan no a spera cu mayoria di hende cu a bay ta di SEPPA y nan no a tuma iniciativa di entrega e premienan, anto despues mi a compronde cu ABV di su mes a bisa cu lo papia cu director pa wak si lo entrega 6 dia di ATV pa nos haya bashi premie, pero nos no ta di acuerdo cu esey.”