Diabierna anochi Directie Volksgezondheid Aruba (DVG) a celebra e 100 añanan di existencia di Salud Publico riba nos isla. Trahadonan di salud publico a yega hunto dilanti di DVG, a pasa un rato agradabel y a haya sa mas di e historia con salud publico a inicia na Aruba. E anochi aki a conta cu presencia di Gobernador Interino, Ivonne Lacle-Dirksz, Minister di Salud Publico, Cuido di Nos Grandinan y Deporte, Dr. Carlos “Alex” Schwengle, ex empleado, pensionadonan y empleadonan di DVG.
Na yegada e invitadonan tabata saca potret cu e backdrop di DVG 100 aña. Robert Jeandor y Su Solo banda Show a percura pa ambiente durante henter anochi. Invitadonan a ricibi un pin como recuerdo di 100 aña di existencia. Gobernador Interino Yvonne Lacle-Dirksz a ricibi e prome pin di DVG, despues a entrega e pinnan na e ex empleado y empleadonan. Tambe a duna un na algun empleado di DVG cu tin mas di 20 aña di servicio. Na final di anochi tur invitado a bay cas feliz y tabata contento di a topa otro for di e ambiente di trabou.
E historia con salud publico na Aruba a cuminsa 100 aña pasa ta cu vacunacion. Aki ta unda cu a cuminsa cu medidanan contra enfermedadnan contagioso cu vacunacion, pero tambe cu medidanan cu tin di haber cu higiena y di eynan e origen di salud publico a inicia, asina Director di DVG, Drs. Jerry Staring a splica. E expectativa di bida a subi drasticamente, unda cu e edad di esunnan cu ta fayece tabata bou di 50 aña pero awo esaki a bira entre 75 pa 80 aña. Tur e medidanan cu a tuma den tur e añanan tabatin su efectonan y ta poni den e expectativa di bida di un persona.
Awo cu salud publico a cumpli 100 aña di existencia, DVG ta mirando pe futuro y esaki ta den e promocion di salud. “Nos tin cu percura pa hisa e conscientisacion con pa hiba un bida saludabel”, Jerry Staring a sigui indica. Salud publico no ta solamente e abstinencia di e enfermedad pero e ta hopi mas pasobra e tin di haber cu felicidad y e desaroyo di ser humano. Esey ta e caminda cu DVG ta bay awo y Jerry Staring ta formando un organisacion cu tin e conocemento pa asina yega e meta.