E Conseho di Mucha, un iniciativa di Prinses Laurentien di Hulanda, a bishita Divi Resorts riba un asina yama “fact-finding mission” recientemente.
E iniciativa ta duna muchanan e chens di tin algo di bisa y ta visible den e proceso di tuma decision den nan pais, y ta permiti organisacionnan di mira nan mes for di e perspectiva di muchanan.
E delegacion di Conseho di Mucha a laga un rapport atras sugeriendo cu e compania mester tuma e tempo pa celebra cooperacion mas hopi, y promove e diversidad inmenso di e herencia cultural di Divi su empleadonan. E muchanan tabatin rason. Divi Resorts ta duna trabou na 33 nacionalidad, cual ta haci e compania un di e companianan mas diverso riba e isla.
Diabierna ultimo, un Feria Cultural na Alhambra Ballroom a presenta un arco iris di sonido, imagen y sabor, unda cu 12 di e compania su nacionalidadnan a celebra nan cultura via cuminda, musica, arte y baile.
E ballroom completamente yen a conta cu e cuminda di Aruba, Filipinas, Colombia, Venezuela, Haiti, Guyana, Hulanda, Mexico, Republica Dominicano, Jamaica, y Peru, ademas di presentacionnan increible di baile di gruponan folklorico y presentacionnan cultural di Haiti, Republica Dominicano, Grenada, Peru y Colombia, incluyendo bailadornan carnavalesco di Aruba.
Nico Connor a hunga su steel pans na e entrada di e evento, Angela Flores a toca e violin, y un brass band local a bishita e evento pa participa den e parada final spectacular.
Director Gerente Alex Nieuwmeyer tabata completamente contento cu e ambiente festivo y aprecio mutuo cu a wordo demostra pa cada cultura participando den e evento. El a priminti un Feria Cultural mas grandi y miho pa otro anja, den e oranan di anochi, bou di e streyanan cu mas nacionalidad ainda.
E atardi a conta cu Tabitha Fecunda, Gerente di Mercadeo & Promocion di Isla pa Divi Resorts, como emcee. Tabitha tambe a produci un tremendo video pa habri e evento, den cual cada un di Divi su nacionalidadnan a aparece riba e pantaya, ripitiendo e mantra “I am Divi.” E efecto di solamente un frase ripiti pa 33 diferente personalidad a presenta e mensahe di un identidad comparti y e unidad di metanan, siguiendo e sugerencia duna pa e Conseho di Mucha, esta di promove e diversidad inmenso di e herencianan cultural di Divi su empleadonan.