AMSTERDAM, Hulanda – E empleado di Ministerio Publico cu a wordo deteni luna pasa na Alemania, ariba sospecho di narcotrafico, ta temporalmente den libertad. Esaki ta loke Ministerio Publico a declarana De Telegraaf.
E corant ta bisa cu e empleado a regresa Hulanda, pero cu ainda e ta sospechoso. Y ainda e ta riba suspension di Ministerio Publico. Door di esaki e no tin acceso na su luga di trabou y tampoco e sistemanan hudicial. Tampoco e mag di tin contacto cu su coleganan.
E muhe procedente di Zoetermeer a wordo deteni hunto cu su yiu muhe y su nuero den un auto prepara specialmente pa narcotrafico. Polis a haya dos kilo di cocaina, seis kilo di amfetamina y dies mil pildo di xtc. E muhe ta nenga di cu e tabata sa di e droganan.
Cu e ta den libertad awo, kiermen cu e lo a hunga un rol di menos relevancia den e henter e asunto aki.