Empleado a perde trabou den pleno pandemia pa agresividad contra colega

Un empleado cu no por a controla su agresividad a perde su trabou cu un salario di casi tres mil florin bruto den pleno pandemia.

Corte a duna e compania SPP Caribbean Beton Industrie VBA rason e retiro di e empleado. Tur esaki ta relaciona cu un incidente cu a tuma luga na pia di trabou.

E empleado retira, tuma den servicio como chauffeur di truck y traha pompstation, no a gusta e ordo di trabou cu el a ricibi di un hefe pa cual el a cuminsa un discusion y a pusha e hefe. E hefe a reacciona pushando e empleado bek, kende a cuminsa bringa e ora.

Despues di esaki a bay oficina pa raporta e incidente y hasta eyden, segun testigonan, e emleado a yega cu un actitud agresivo cu dos persona mester a separ’e for di su supervisor.

E hecho aki a tuma luga dia 16 di september y a dicidi di mand’e cas inmediatamente, manteniendo su salario, pa haci un investigacion. E conclusion di e investigacion a conduci na su retiro dia 21 di september mes.

Violencia na pia di trabou y durante un pandemia cu tur hende ta trata di mantene su trabou, no tabata e miho actitud di e empleado aki, kende awor a keda man bashi, sin salario. Y riba dje gasto di Corte. Como cu el a cuminsa y perde e caso, e tin cu paga gastonan di procedura di SPP, calcula na 2500 florin.

Comments

comments