TOKYO, Japon- Akihito a tuma despedida den un ceremonia cu a tuma luga den e Pine Salon di e Palacio Imperial na Tokyo. E acto a tuma luga prome cu e proclamacion di su yiu, Naruhito, como emperador. E emperador Japones, Akihito a conclui e ceremonianan di su abdicacion, cediendo e trono di Crisantemo na su yiu mayor Naruhito, den e prome abdicacion den dos siglo. Akihito, di 85 aña lo ta emperador te cu mei anochi, ora cu Japon drenta den e aña 1 di e era imperial nobo “Reiwa” (armonia bunita), despues di tres decada di era Heisei (“logrando paz).
E ceremonia principal, cu a dura 10 minuut, a tuma luga den e Pine Saloon (Matsu-o-Ma), considera esun mas elegante di e palacion imperial, bisti den un trahe formal, a pronuncia un discurso cortico: “Mi ta expresa desde e fondo di mi curason mi gratitud na e pueblo di Japon cu a aceptami como simbolo di estado y cu a apoyami”, el a lesa for di su papel, haciendo referencia na constitucion cu ta na vigor desde 1947, unda cu e emperador a stop di tin un status di semidios. Den oranan di mainta, bisti cu’n tunica elegante y voluminoso di color maron cu oro, y un sombre preto, e emperador a realisa e ritual di “informa” di su abdicacion na su ancestronan den varios santuario di e palacio imperial.
Fiesta historico
Aunke e dia di yobida aki no a congrega un multitud grandi dilanti e recinto protegi den centro di Tokyo, Japones y turistanan stranhero presenta tabata sinti nan mes dividi entre e emocion di e momento y e entusiasmo di un era nobo. “Mi a nace den e era Heisei dus mi ta un tiki tristo di cu esaki ta caba, pero toch mi ta nervio pa e era nobo cu ta cuminsa”, un studiante di 13 aña a sigura.
E poblacion ta celebra un festeho historico y casi inedito ya cu e biaha aki e nacion no ta di luto pa e morto di un soberano, manera tabata e caso na 1989 (morto di Hirohito, tambe yama emperador Showa), na 1926 (pa emperador Taisho) y na 1912 (pa e emperador Meiji).