MADRID, Spaña- E posicion di e diplomatico tabata centro di atencion di polemica ariba rednan social, caminda cu hopi usuario a rechasa su comentario y a critica e politica Israeli relaciona cu Palestina.
E activista Palestino Ahed Tamini a wordo ricibi diabierna pa directiva di Real Madrid den e stadion Santiago Bernabéu di Madrid, Spaña. Tamimi, di 17 aña, a wordo deteni na december 2017 despues di bofta algun soldaat Israeli y a wordo libera na final di juli despues di ocho luna den prizon.
E defensora iconico di e causa Palestino a probecha su participacion e siman aki na varios evento politico y social na Spaña pa participa hunto cu su famia e centro deportivo merengue. Emilio Butragueño, director di Relacionnan Institucional di e club, tabata esun encarga di ricibi Ahed y tambe di entreg’e un camiseta cu su nomber, segun Marca.
Defensor di violenca y teror
E recepcion di e ekipo Madridista a wordo critica despues pa e embahador di Israel na Spaña, Daniel Kutner, cu a califica e hoben di “defensor di violencia y teror”. Di mes manera como simbolo di protesta, el a nenga di asisti na e encuentro entre e club merengue y Atlético de Madrid, cu a tuma luga diasabra.
“E institucionnan cu a ricibi’e y a festeha ta apoya indirectamente e agresion y no e dialogo, y comprension cu nos mester”, el a sigura.
E posicion di Kutner tabata centro di polemica entre usuarionan di rednan social cu den nan mayoria a rechasa su comentario y a critica e politicanan Israeli relaciona cu Palestina.
E gesto amistoso di Real Madrid a genera opinionnan varia riba rednan social. Hopi a aplaudi e club, incluso esunann cu a confesa di no ta fanatico di e ekipo. Otronan, ta considera cu su directiva mester mantene su mes na un posicion neutral den casonan politico.