Institutonan cu ta acesora y conseha partido AVP un pa un ta conociendo un proceso di revitalisacion importante. Algun luna pasa a institui un Directiva nobo pa e instituto cu ta percura pa formacion politico, Fundacion Digna Lacle Herrera FDLH bao dirigencia di hoben hurista y entrepreneur Ichelle Oduber Simons.
Corto despues FDLH a percura pa un serie di cursonan cu a acapara un cantidad di tema hopi importante pa un persona interesa den conocemento di politica y servicio publico. Mas di 25 persona a completa e curso aki y dentro corto lo inicia un otro serie di curso di formacion. E biaha aki ta aspectonan practico pa locual ta trata e proceso electoral y campanja. Lider di Partido, mr. Mike Eman ta duna un empuhe grandi na e revitilisacion aki y ta mustra cu esaki semper tabata e forza di conocemento y motivacion den teamnan di AVP cu a haci cosnan grandi pa Aruba.
Den e cuadra aki tambe Eman y un delegacion di AVP a bishita na December ultimo e hala scientifico di CDA na Hulanda pa haya cooperacion pa revitalisa e cooperacion entre e halanan scientifico di AVP y esun di CDA. Tambe pa e proceso aki mr. Mike Eman a logra di inspra un cooperacion nobo pa realisa e revitalisacion di Fundacion Mito Croes, instituto pa estudionan social-cristian Aruba.
Cu e animo renoba aki a realisa un directiva nobo pa Fundacion Mito Croes bao guia di un hoben profesional, John Hart y cu miembronan nobo profesional den e directiva: medico Noreen Vingerhoedt, maestro di school Giovanny Christiaans, politicoloog y logistic manager, Aad Jan de Gruil, business & maritime -consultant Josephine Lacle, experto financiero Jonathan Sjiem Fat y profesional den educacion y veterano den politica como consehero di e fundacion, Rene Herde. E moderadora pa e anochi exitoso aki tabata maestra Otami Thomasia.
Ambos aspecto, e revitalisacion di e relacion entre e hala scientifico Mito Croes y e hala scientifico di CDA y tambe e renobacion di e directiva di Fundacion Mito Croes a bini hunto den un forma sumamente inspirativo cu un anochi di instalacion di e directiva nobo, combina cu un lectura di un huesped special di e hala scientifico di CDA. Esaki tabata den e personalidad di e director di e hala cientifico di CDA, Pieter Jan Dijkman.
Tanto den su presentacion, e scientifico di maneho publico y politica, Pieter Jan Dijkman, a accentua e proceso cu e a inicia cu e lider di AVP, mr. Mike Eman pa revitalisa e lasonan y tambe e profundisacion di e valornan y principionan grandi di e ideologia social-cristian comun cu e dos partidonan ruman tin.
Y mr. Mike Eman di su banda a mustra con cooperacon cu e hala scientifico di CDA historicamente a contribui grandemente na estudionan y maneho profesional cu partido AVP por a conduci pa Aruba. Den esaki tambe e dos dirigentenan a accentua e atencion special cu nan lo duna na desaroya conhuntamente ideanan nobo basa riba e BON COMUN como e luz di guia. Den tur tres lecturanan di e anochi aki di Fundacion Mito Croes, di John Hart, Pieter Jan Dijkman y mr. Mike Eman, por a sinti e motivacion y dedicacion revitalisa pa duna pueblonan un avenida alternativa atrobe basa riba e principionan di BON COMUN. Ta obvio for di e exitonan recien cu e proceso cu mr. Mike Eman a inicia den su partido y cu institutonan cu ta asesora e partido ta inspirando un animo di revitilisacion importante pa e partido y Aruba.
