Parlamentario Alan Howell a expresa su mes hopi fuerte contra e forma di actua di oponentenan politico cu den un forma contra tur fatsoen a dicidi di bay instiga y lanta hende pa haci rotzooi na un warda di polis.
E parlamentario di POR a bisa textualmente “Mare cu Dios su poder mañan mi por topa cu parlamentarionan Dowers (ex minister di Husticia) y Candelaria (ex inspector di polis) cara cara den Parlamento, pa asina mi dunanan 2 placa di palabra cu mi tin pa nan. Ki mishi e dos hombernan aki cu SA MIHOR ta bay instiga y lanta hende pa bay haci rotzooi na warda di polis cu intencion pa libera un persona deteni cu ta bou investigacion pa echonan castigabel. Francamente bisa mi a perde totalmente respet pa nan”.
Howell ta indica cu tur hende por tin nan opinion, pero mester duna husticia e espacio pa actua y no por ta asina cu pasobra Eman, Dowers y Candelaria ta kere un cos nan ta riba ley y por bay instiga y haci bochincha dilanti warda di polis…ta ki ehempel e politiconan aki kier duna comunidad. Pasobra si esey ta e ehempel, mañan e ora ei cualkier gang tambe tin e derecho pa bay na un warda di polis pa menasa y haci bochincha pa saca nan ‘brother’.
“Mi lo a duna 5 minuut exacto pa tur hende move di eynan, sino mi lo ruim op de boel”, Alan Howell a finalisa bisando.