10 di Mei 2021, Jeugd en Zeden Politie a haci un entrada hudicial na un cas na Tanki Leendert y a detene e homber di Rudy Elvio Juaquino Weert naci na Aruba di 60 aña pa abuso sexual di menor (Art. 2.197, art. 2:200 jo. art. 2:210, art. 2:201 jo. art. 2:210 y art. 2:208 di nos codigo penal). Na dicho cas a confisca entre otro computer, laptop y telefon. Esaki tabata e informe cu Ministerio Publico a manda dia 10 di mei ultimo na momento cu a detene e persona aki.
Weert, conoci bou di e nomber “Querido Oyente” (pa su programa radial), ta wordo acusa di violacion di un persona menor di edad, kende tabata den su cuido durante e periodo di 19 di maart 2005 te prome di maart 2009 hibando e den auto na un luga di scondi of aleha.
E ta wordo acusa di abuso sexual di e persona menor di edad aki, cu tabata na su cuido y vigilancia, durante e periodo di 19 di maart 2005 te 18 di maart 2007.
E ta wordo acusa tambe di actonan di inmoralidad cometi contra e persona menor di edad aki, cu tabata na su cuido y vigilancia, durante e periodo di 19 di maart 2007 te 1 maart 2009.
Un otro acusacion contra Weert ta cu el a duna a duna e persona en cuestion un tratamento di cual e tabata sa cu e lo termina su embaraso den e periodo di 19 di maart 2006 te 19 di maart 2009, sin permiso di e persona.
E ta wordo acusa di a intencionalmente y cu premeditacion causa lesion grave na e persona den e periodo di 19 di maart 2006 te 19 di maart 2009 door di hinca un hangua den su curpa a consecuencia di cual e persona a sufri un aborto.
Pues poco acusacion serio mes.
OTRO CASONAN
Banda di dje lo tin dos otro persona mas cu nan caso lo ta den Corte como proforma.
Ta trata aki di Carmen Luz BARRERA BECERRA. E acusacion contra dje ta traficacion di hende den e periodo di 10 di juli 2018 te 4 di mei 2021. Y y Yerremy Yonathan Toppenberg ta wordo acusa di posesion di cocaina riba 4 di mei 2021, benta di hennep den e periodo di 4 di december 2017 te 4 di mei 2021, pildonan di XTC/MDMA riba 4 di mei 2021 y posesion di un pistol y balanan riba 4 di mei 2021.
Tur e casonan aki ta proforma, loke ta nifica cu lo pone un otro fecha pa e tratamento profundo di e casonan. Probablemente lo no trece nan Corte tampoco pa esaki so.
