Elton Lioe-A-Tjam (ABO): Un ‘Amienda’ cu ta practico, facil pa implementa pero cu ta hopi necesario

Manera nos honorabel miembronan di parlamento ta tratando e 800 cambionan di nos Codigo Civil y manera nan a demostra un unanimidad excepcional dia 8 september 2016 ora nan a pasa e ‘Amienda Union Civil’, cu tampoco tabata inclui inicialmente den e 800 cambionan, nos di partido ta propone pa nan duna e siguiente ‘Amienda di Trankilidad den Barionan’, e mesun trato preferencial.
Como consecuencia di e mal maneho cu a wordo hiba durante añanan largo, awendia Aruba a para bira un ‘Wild West’. Un ‘Wild West’ unda algun hende no tin respet mas pa ciudadano, nan propiedad, nan derechonan, nos custumbernan tradicional di bon etica y conducta, e trankilidad den barionan, nos ley y reglanan of agentenan policial. A bira necesario pa caba cu e ‘DESIGUALIDAD’ social aki. P’esey nos di partido ABO ta propone e siguiente ‘amienda’ menciona, pa caba cu e desaroyo negativo aki y alabes caba cu e molester y problema den barionan, a menos e ta trata di un fiesta di cumpleaño of ocasion special.
‘Amienda di Trankilidad den Barionan’:
Pa duna e agentenan policial e poder pa sanciona e causante di molester den bario direct cu un multa di 1000 florin, despues di e segundo aviso (bishita di polis). Pa tur siguiente aviso pa e mesun denuncia, e causante lo tin cu paga 5000 florin y sin excepcion. Pues no lo tin un dispensacion pa e causante pasobra e ta un ‘bon amigo di e minister’.
Importante pa pueblo tuma nota di dje ta, cu e implementacion di e ‘Amienda di Trankilidad den Barionan’, no tin cu tuma 100 aña, manera normalmente e ta e custumber di e politico tradicional regla asuntonan den bienestar general. Pasobra e ‘Amienda di Trankilidad den Barionan’ tin su base legal regla caba den e ‘Algemene Politieverordening, AB 1995 no. GT 8 Hoofdstuk II Maatregelen ter bevordering van de openbare orde, rust, veiligheid en reinheid’.
Cu e implementacion di e ‘Amienda di Trankilidad den Barionan’, e siguiente beneficionan lo wordo logra a corto plaso:
Agentenan policial lo no tin cu haya 1000 yamada cada dia pa atende cu e mesun caso di molester. Asina e agente policial por dedica mas tempo pa combati e criminalidad creciente;
E causante perpetuo di molester den bario lo sa direct cu mal comportacion y conducta no ta wordo tolera riba e isla aki y cu nos custumbernan, leynan y autoridad policial mester wordo respeta;
E trankilidad den nos barionan lo bolbe bek y wordo salvaguardia;
Hopi ciudadano lo wordo alivia y yuda di e molester creciente, perpetuo y dañino cu alabes ta destruyendo nos sociedad y nos forma di biba.
Awor ban wak kende su interes nos honorabel miembronan di parlamento lo sirbi. Ban wak si nos honorabel miembronan di parlamento lo por haya otro, net manera a sosode dia 8 september 2016 den forma ‘relampago’, pa asina e ‘Amienda di Trankilidad den Barionan’ por bira legal y asina caba tambe cu e ‘DESIGUALIDAD’ social den bario. E ‘Amienda di Trankilidad den Barionan’, ta uno practico, uno facil pa implementa pero uno cu ta hopi necesario pa nos ciudadanonan, e trankilidad den barionan y e bienestar general.

Comments

comments