Dia 7 october, gobierno a organisa un fiesta pa apertura pa e ‘Mehorador, NO-GREEN’, unda tur presente por a scucha un discurso politico socialista di incorporacion pa un orador stranhero. Pero manera nos ta custumbra di gobierno, ‘la fiesta’ tin cu continua pa no laga specialmente e pueblo di San Nicolas mira con y kico gobierno realmente ta pensa di dje. Pueblo di San Nicolas tin cu keda ciego, dependiente y agradecido na AVP. P’esey dia 22 october, lo tin un otro fiesta ‘Mehorador’. Mas pueblo di San Nicolas fiesta, mas algun persona lo keda convenci cu fiesta ta democracia y progreso y cu e gobierno di AVP kier nan bon. Pa no lubida cu e mesun personanan aki lo ta menos dispuesto pa mira cu nada locual AVP a priminti e pueblo di San Nicolas durante 30 aña, a wordo realisa. San Nicolas a haya solamente fiesta y ‘Peanuts’!
Pero esey ta e tactica di AVP pa mantene un parti di e pueblo ciego y dependiente di nan, uzando fiesta pa no mira e berdad of acepta e realidad. E siguiente fiesta ‘Mehorador’, ta mas grandi y luhoso cu esun prome. Y e motibo pa esaki ta pa crea un otro ‘smoke screen’ pa NO LAGA PUEBLO DI SAN NICOLAS MIRA CU AVP NO KIER UN GOBERNADOR DI SAN NICOLAS!
Cu e procedura pa nombra un gobernador nobo no a bay manera AVP tabata desea, solamente ta confirma cu nos sistema democratico no ta funciona y cu AVP kier elimina mas ‘checks and balances’ di poder. Di un forma arogante y ‘sneaky’, AVP kier a ‘bully’ su deseo pa e actual minister di Finansas, cu a prepara diferente presupuestonan y medidanan pisa pa pueblo, bira gobernador pa firma su propio presupuesto 2016-2017 den ley. Un miho y visibel ehempel di ‘CONFLICT OF INTEREST’, MAL GOBERNACION y intento pa introduci DICTADURA no por tin.
E carta di gobierno di 12 october 2016, ta confirma cu gobierno a tuma tur e otro candidatonan pa e puesto di gobernador haci. Nunca gobierno su intencion tabata pa un di nan bira gobernador. Gobierno su candidato semper tabata e actual minister di Finansas: ‘De ministerraad van Aruba heeft vanaf het begin duidelijk gemaakt dat zij dhr. mr. A.R. Bermudez als kandidaat had aanbevolen.’. Alabes gobierno ta mustra cu e candidata di San Nicolas, riba e lista di postulacion, nunca tabata un candidata serio. Gobierno a pone riba e lista pa puro motibonan sentimental politico: laga pueblo di San Nicolas keda contento cu un hende di e bario a wordo postula, pero ta Hulanda a rechasa su candidatura y no AVP. Pero en realidad, e la wordo uza como DECORACION POLITICO!
E carta aki y e postura tuma pa gobierno, ta laga pueblo di San Nicolas mira claramente con AVP ta pensa y balora San Nicolas y pariba di brug. Na 2014, e minister-president a agredi y a insulta un gobernador di Savaneta. Awor e mesun minister-president ta bolbe uza su campaña di intimidacion, insulto y agresion contra e gobernador nobo procedente di San Nicolas. Un persona cu e minister-president mes a scoge pa traha p’e, enbes di otro hende di AVP.
Cada biaha cu pueblo pensa cu e nivel democratico no por baha mas, nos politiconan tradicional ta demostra cu ainda nan por haci pio. Cu e postura baho di AVP contra e nombramento di Sr. Boekhoudt como gobernador, pueblo por mira ki tipo di mandatarionan nos tin, ki sorto di democracia AVP kier impone riba pueblo y pueblo di San Nicolas a haya sa exactamente con AVP ta pensa di nan. Si bo ta un ‘ja-knikker’ cu ta acepta tur cos, anto bo ta un bon AVPista. Pero momento cu bo no haci loke e ‘gran lider’ ordena, DIOS SPAAR BO Y BO FAMIA!
E atakenan personal riba e persona di Sr. Alfonso Boekhoudt, no ta corecto, necesario of agradabel. E atakenan aki ta confirma cu persecucion politico ta wordo practica na Aruba, cu e solo meta pa asesina e caracter y bon nomber di Sr. Alfonso Boekhoudt. Pero mas serio ta, cu e atakenan ta wordo haci pa debilita e posicion di gobernador y asina silenciosamente implementa un sistema politico dictatorial. No tabata un casualidad cu un aña prome cu eleccion, diripiente AVP a bira un bon amigo di un pais bisiña y a permiti cu un discurso politico socialista di incorporacion por wordo hiba pa un orador stranhero na e prome fiesta di e ‘Mehorador’.
Nos di partido ABO ta contento cu Sr. Alfonso Boekhoudt a wordo nombra como gobernador y no e actual minister di Finansas. Aruba tin un ‘Stempel Parlement’ caba y un ‘Stempel Gouverneur’ lo ta un poco di mas. Spera cu e postura lamentabel y condenabel di parti di AVP, lo laga henter pueblo di pariba di brug y San Nicolas, mira con AVP ta pensa, mira y aprecia e pueblonan aki. Pa San Nicolas tin ‘Party, Peanuts & Pollution’. Pero un gobernador, NUNCA!