Elton Lioe-A-Tjam (ABO): Nada lo cambia si no kibra e circulo vicioso di destruccion

 

E politico tradicional a crea e MEGA DEBE, pa laga un parti di e pueblo kere cu proyectonan ta sinonimo cu bon gobernacion y progreso. Pa ehecuta e proyectonan aki, cu supuestamente tabata necesario pa e economia, Aruba mester a atrae migrantenan. Hasta den periodonan unda e economia no tabata bayendo bon, migrantenan tabata wordo permiti pa establece nan mes na Aruba. En realidad e meta principal tras di e proyectonan no tabata uno economico of di progreso. E proyectonan tabata un camuflahe pa enrikece un grupito selecta, mientras cu e perdida continuo di sosten politico bou di e hende local, lo wordo compensa pa migrantenan. Pa garantisa e fluho continuo di migrante, tur sorto di privilegio y ley mester a wordo cambia, manera esun di AZV. Pasobra e politico tradicional a descubri cu e migrante si lo keda eternamente ‘gradecido y fiel’, na esun cu a regla su papel, permiso of percura cu e si por mehora su bida. Pa e hende local, e politico tradicional no tabata tin tempo, atencion of oido mas. Solamente durante eleccion. Pues silenciosamente e votado local ta wordo reemplasa pa esun di otro nacionalidad.

E plan politico di reemplaso, tambe ta trece problemanan social, manera criminalidad y insiguridad. Pero di e menasa aki, nos politiconan tradicional no ta papia of kier bisa pueblo. Segun nan, e aumento di insiguridad ta un percepcion y un problema di nos hubentud. Esun cu kier kere esaki, ta gaña nan mes. No tur migrante ta bini nos isla cu bon intencion. No ta pa simplemente decoracion, tur cas na nan pais tin ‘rejas’ tur caminda of camara di siguridad. Pero asina mes, nos fronteranan a keda hancho habri. Te ora un incidente lamentabel sosode, un otro comision pa studia e asunto ta wordo instala, pa asina laga pueblo kere cu algo ta wordo haci.

Loke pueblo tin cu realisa, cu tur nos problemanan social ta mara na otro y cu nan ta forma parti di e CIRCULO VICIOSO DI DESTRUCCION di Aruba. Ora no tin suficiente trabou pa tur hende, e sueldonan lo baha (‘Cheap Labor’), trabounan lo bira temporal (pues no tin siguridad economico), trahadonan cu poco educacion lo wordo reemplasa riba e mercado laboral pa esunnan cu mas educacion, e desempleo lo sigui aumenta (special bou hobennan), e ‘zwarte economie’ lo bira mas grandi (menos control, transparencia y entrada pa gobierno) y criminalidad cu insiguridad lo subi.

Esaki ta e desaroyonan actual y e cosecha visibel di hopi aña di mal gobernacion y di e politica di reemplaso. Loke e politico tradicional a logra converti Aruba aden, eticamente of moralmente no ta corecto of husto. E no ta bon ni pa e hende local of e migrante. Cu e politica aki di entreguismo, e futuro generacionnan a wordo priva y limita den nan desaroyo.

Recientemente, e politico tradicional a bolbe confirma e existencia di e CIRCULO VICIOSO DI DESTRUCCION, momento cu e la REDOBLA e MEGA DEBE y e poblacion, aprobando e ‘CITGO-deal’, djis pa e por haya un cabay di campaña. Mientras pa pueblo haya atencion y un compromiso riba papel di 10 miyon florin, pa combati criminalidad y insiguridad, mester a bin un manifestacion. Pues e ta mas cu obvio cu nada lo cambia, si no kibra e CIRCULO VICIOSO DI DESTRUCCION cu e politico tradicional a crea.

Comments

comments