Elton Lioe-A-Tjam (ABO): Hiep, hiep hoera..‘Que sigue la fiesta’. Ta pueblo ta paga toch!

Algun siman atras, ora cu su ‘UN Green lobby’ a fracasa, nos minister-president a dicidi cu e ta bay ‘hi-jack’ e fiesta di cumpleaño ‘historico’ di e minister di Energia cu su apertura di e ‘mehorador’, pa asina e drenta bek den ‘picture’ politico local. Tur cos y recurso mester wordo utilisa, pa graba den mente di pueblo cu e apertura di e ‘mehorador’ a wordo realisa riba 1 september y no riba 13 mei 2016. Pues riba e dia cu nos prome minister ta haci aña. E fiesta di cumpleaño ‘historico’ di e minister di Energia mester wordo reemplasa pa esun di e minister-president. Doloroso e mester tabata pa e mesun minister di Energia wordo encarga pa anuncia y organisa e fiesta aki. Pero asina ta e bida politico den e partido ‘Green’. Pa esunnan cu por scucha bon, nan por hasta tende con e minister-president ta pensa di esaki: ‘Bon trabou colega, pero awor hala un banda p’ami ‘steal the show’’. E di 3 fiesta apertura ‘mehorador’ den algun luna, cu e solo meta pa susha wowo di algun hende. Pero kico realmente gobierno kier pa pueblo celebra, banda di e fiesta di cumpleaño di e ‘gran lider’?
Cu a condena pueblo na un otro aventura biyonario, sin cu pueblo of parlamento sa cuanto e ‘joke mehorador’ aki lo costa;
Cu a crea mas cupo di trabou pa stranhero enbes di hende local, pero cu a logra laga algun hende local kere diferente;
Cu a regala Valero mas miyones di locual e la haya caba ‘sneaky y scondi’;
Cu a exonera Valero di tur su obligacionnan ambiental y di desmantelacion miyonario;
Cu a logra laga un parti di pueblo no mira cu awor mas cu antes, e pueblo y e medio ambiente lo wordo poluciona y toxifica;
Cu a bolbe pasa parlamento un ‘fastball’ no solamente cu e ‘CITGO-deal’ di 2000 pagina y e violacion di e ‘Settlement Agreement’, pero cu awor a crea un otro empresa estatal, sin permiso di parlamento, unda salarionan miyonario lo wordo paga atrobe na esunnan mas cerca di e minister;
Cu a bolbe gaña un parti di pueblo, net manera nan a haci na 2009 y 2013 cu PEMEX y Petro China, cu esaki ta un ‘deal’ bon y duradero;
Cu a logra laga un parti di pueblo kere, cu pasobra nan lo mira algun movecion laboral den refineria prome cu eleccion, cu esaki lo ta e garantia cu kisas aki 2-3 aña ora e ‘mehorador’ habri, nan lo haya un trabou bon paga;
Cu a logra bende un parti di pueblo, cu e US$ 10 miyon cu e operador nobo lo paga na impuesto, locual ta hopi menos cu e Afl. 27 miyon cu e mester a paga legalmente, ta bon y cu e ta e ‘salbacion’ pa Aruba;
Cu a logra convence un parti di pueblo, cu e miserabel US$ 10 miyon cu Aruba lo ricibi na impuesto, lo elimina e debe di mas di Afl. 4 biyon florin cu gobierno mes a crea cu su mal maneho y proyectonan di locura ‘Green’;
Cu a logra sconde cuanto ‘finder’s fee’ lo wordo paga atrobe y na kende, riba custia y lomba di pueblo;
Cu a logra convence un parti di pueblo cu e ‘deal’ aki ta bon y e ‘salbacion’, mientras cu en realidad e no ta ‘make good business sense’, e no ta den beneficio di Aruba of cu e lo tabata hopi mas economico y beneficioso pa construi un refineria nobo pa e prijs cu pueblo lo tin cu bay paga awor pa e apertura di e ‘mehorador’ bieu;
Cu a bolbe gaña un parti di pueblo cu gobierno ta haciendo un ‘bon trabou’, mientras en realidad e ta kibrando structural e fondomen di e sociedad Arubano pa otro nacionalidadnan bin probecha.
Esaki ta djis algun observacion pa ilustra cu e ‘CITGO-deal’ no ta un ‘salbacion’ pa Aruba, manera gobierno kier laga un parti di e pueblo kere. E di 3 fiesta apertura ‘mehorador’, ta nada mas cu simpel propaganda politico ordinario, barata y bieu, pa gana eleccion. Solamente asina e politico tradicional, cu semper a defende su propio interes, por sigui den poder pa fiesta cu placa di pueblo na su antoho. Ban spera cu e biaha aki, e mesun parlamentarionan cu e fiesta y a grita pabien riba 13 mei 2016, sin cu nan a mira ni un documento, no lo bolbe haci mescos y asina comproba cu nan t’ey solamente pa sirbi tambe nan propio interes. Hiep, hiep hoera…‘Que sigue la fiesta’. Ta pueblo ta paga toch!

Comments

comments