Ora hopi hende a pensa cu e ‘College Aruba financieel toezicht (CAft)’ lo a para e malgastamento acelera di fondonan publico, pa asina salba e pueblo y su futuro generacionnan di un abismo financiero total, nan a keda decepciona. Ainda pueblo ta mira cu no tin un fin na e malgastamento di placa. A pesar cu diferente medida a wordo implementa, riba lomba di pueblo, pa baha y controla esaki, e debe nacional a sigui crece te na 83% BBP (2016). Pues di cada florin cu Aruba ta produci, 83 cen ta bay pa paga debe.
Na diferente ocasion, partido ABO a cuestiona e forma con cierto rapport y consehonan tabata wordo presenta, pasobra nan no tabata duna un bista completo di tur e debenan. Keto bay, nos politiconan tradicional ta papia di e debe nacional di alrededor di 4 biyon florin, lubidando pa menciona e debenan biyonario di e proyectonan cuestionabel manera ‘Black Corridor’, ‘Watty Vos Blvd.’ y e ‘Mehorador CITGO’. E prome dos proyectonan lo costa pueblo 1.6 biyon florin, mientras di e ultimo, ni gobierno of parlamento kier splica pueblo cuanto biyon esaki lo costa. Nos ta calcula cu esaki lo costa minimal 4 biyon. Pues gobierno y parlamento a logra sconde un extra MEGADEBE di mas di 5 biyon pa pueblo. Aruba su debe nacional lo ta rond di 9 biyon awor!
Partidonan di oposicion no ta laga un dia pasa, pa laga pueblo sa con e gobierno actual a redobla e debe nacional. Wel dicon nan no kier duna pueblo e informacion completo y cuminsa papia riba e extra MEGADEBE aki, cu a wordo crea durante e ultimo 3 añanan cu nan cooperacion y sosten? Dicon nan no kier splica pueblo cuanto mas medida e extra MEGADEBE lo nifica pa pueblo y su futuro generacionnan? Dicon nan no kier bisa pueblo e berdad prome cu eleccion cu e extra MEGADEBE aki, awor si e politico tradicional a manda Aruba BANCAROTA? Pueblo no merece di sa e BERDAD prome cu eleccion?
Ta un custumber di institutonan pa uza palabranan bunita pa pinta algo mas bunita cu loke e ta. Despues cu pueblo a wordo mara pa entre 20 a 25 aña na debenan biyonario, CAft ta bin cu un recomendacion pa limita e PPP-proyectonan. CAft ta propone pa limita esakinan na maximal 1.5 te 2.0% di e gastonan colectivo, pa asina mantene un ‘duurzaam houdbare overheidsfinanciën (Halfjaarraportage CAft januari 2016-juni 2016). Desde aña pasa, partido ABO a puntra CAft su opinion riba e proyecto ‘Black Corridor’, como e instituto cu mester vigila e situacion financiero. Te awe, partido ABO no a haya un reaccion. Mientrastanto e proyecto menciona y diferente otro ta den pleno ehecucion. Pues despues cu gobierno a horca pueblo atrobe financieramente, CAft ta bin cu un recomendacion pa PPP-proyectonan. Pa partido ABO, esaki ta hopi laat y e ta un otro muestra di ‘pappen en nat houden y mosterd na de maaltijd’.
Pa ilustra esaki, den e tabel adhunto (Presupuesto 2017), pueblo por mira cu e recomendacion di CAft pa PPP-proyectonan, ta ‘achterhaald’ caba. Pa otro aña, e gastonan di e PPP-proyectonan lo ta 1.5% di e gastonan colectivo y den apenas 3 aña, esaki lo crece bay pa 2.9%. Con e crecemento lo sigui despues di 2020, ningun hende sa. E ta hopi probabel cu esaki lo sigui aumenta, teniendo cuenta cu e trend di e cifranan den e tabel. Pues ki balor e recomendacion di CAft tin? Gobierno ta sigui haci loke e kier. Gobierno no ta respeta pueblo, parlamento of ningun palabracion. Y continuamente gobierno ta mustra cu tampoco e ta respeta CAft.
Presupuesto 2017 no solamente ta un otro presupuesto ficticio cu ta mustra claramente kico ta e consecuencianan di e maneho ‘UN TIKI ROOD’, pero alabes e ta confirma con institutonan cu mester a yuda preveni cu Aruba wordo hinca den ‘HOPI ROOD’, tambe ta manipula pa laga hende kere cu e situacion no ta ASINAAA MALO. FOEI!