Elton Lioe-A-Tjam (ABO): Dicon diripiente nacionalidad no ta conta?

Historia ta mustra bon cla cu e clase priviligia politico, semper kier mantene e pueblo bobo, ciego y dependiente di dje, uzando trikinan manera di tira pinda, show y intimidacion. Tur esaki pa e por keda hopi tempo den poder pa asina e por sigui haci y deshaci na su antoho cu fondonan y recursonan publico. A pesar cu algun hende lo gusta pensa cu e no ta asina, den e grupito aki, ta solamente algun hende por drenta. Pues e no ta manera algun fiel sostenedo di e clase aki ta pensa, cu si nan sigui abusa y maltrata e pueblo manera nan a wordo instrui pa haci, un dia nan tambe lo wordo permiti pa forma parti di e clase priviligia. Aki ta unda manipulacion y indoctrinacion ta hunga un rol, pa no bisa ‘tuma haci’. Pasobra mas dependiente un persona ta di un otro persona, menos e ta capaz pa pensa pa su mes y mas e lo ta dispuesto pa acepta tur cos.
Un otro aña escolar a cuminsa y atrobe e mesun cantaleta anual di cuanto scol a haya airco of cu a wordo drecha pa gobierno, por wordo scucha atrobe. Pero e aña aki, tin un diferencia. Parce cu e rector saliente di Colegio Arubano a pasa su adicion pa prensa, pa e presidente di e conseho di supervision actual di Colegio Arubano. Porta kisas e tambe a haya mientrastanto ambicion politico, moviendo den e circulo intimo di nos prome minister. En general dunamento di informacion ta algo bon y sano, ningun hende lo disputa esey. Pero ora e dunamento di informacion tin un otro meta, anto e ora ey e ta bira algo repudiabel. E actual conseho di supervision a organisa un encuentro elocuente cu e docentenan di Colegio Arubano na Seaport Conference Center, pa despues sali afo bisa cu awor si tur hende ta di acuerdo cu e rumbo nobo scoge pa Colegio Arubano y cu e conseho aki a siña su les di ‘blunders’ miyonario cometi pa e consehonan anterior cu e nombramento di e ultimo dos rectornan, cu no a funciona pero cu si a cobra hopi placa. En realidad e conseho di supervision a organisa full un show pa trankilisa algun docente y mayor, prome cu e la pasa nan un otro rector no Arubano den stoma. Tres sigui den rij. Tabata remarcabel pa scucha e actual presidente, señor Kool, hustifica e decision aki cu: ‘Nunca nacionalidad tabata un criterio pa evalua. Nos ta busca un persona di bon calidad cual ta hopi importante y nos a haya un candidato hopi bon cu ta na Hulanda (Bon Dia, 20 Augustus 2016)’.
Wel cu tur respet pa señor presidente Kool, su conseho di supervision y e comision di evaluacion cu a tuma e decision aki, pa nos di partido ABO bo no por hala e asunto di nacionalidad asina simpel for di mesa teniendo cuenta cu e sensibilidad di e asunto aki den comunidad, e deseonan cu ta reina den pueblo, e historia cu e dos ultimo rectornan y e señal importante cu bo ta duna e alumno, pues e futuro generacion. By the way y pa claridad, nos tur tin e mesun nacionalidad. Pues e uzo di e palabra pa señor Kool pa no bisa naci na Hulanda, ta un tiki straño. Pero manera señor Kool a uza e palabra nacionalidad den e contexto aki pa no bisa locual e kier a bisa, nos lo elabora uzando e palabra den e mesun contexto.
E no ta un secreto publico cu ‘profielschets’ ta wordo skirbi cu ta pas solamente e candidato preferi y ya scogi. No ta importa nos kende bis’e of cu si e ta di peso pluma of no, nos mensahe ta keda mescos. Es mas, e show aki no a duna nos ningun informacion di balor pa pone nos cambia di nos postura. E no por ta cu cada aña Aruba ta manda mas di 200 studiante bay studia den exterior y vooral e ultimo añanan pueblo tin cu scucha constantemente cu no tin hende local capaz pa guia Colegio Arubano. Colegio Arubano a wordo dirigi exitosamente pa hopi aña pa hende local. For di ki dia esaki no por mas? Esaki ta un idea isola di solamente e conseho di supervision cu semper sa miho of e ta e idea general cu ta reina na Colegio Arubano? Hopi straño cu ningun conseho di supervision di e ultimo añanan, por haya un hende local capacita pa dirigi Colegio Arubano. Anto splica pueblo anto dicon si por a haya hende local y capaz pa dirigi Colegio San Nicolas y e Universidad di Aruba.
Si nos sigui analisa e declaracion di e presidente di e conseho di supervision, nan a ‘busca un persona di bon calidad’. Cu e declaracion aki, e presidente ta bisa indirectamente cu na Colegio Arubano (y na Aruba) no tin hende di ‘bon calidad’, p’esey nan mester a busca un hende di exterior. Y pa confirma e postura un poco straño aki, awor despues di mas di 10 aña, e conseho ta ofrece e docentenan cu ambicion un ‘programa pa entrena rectornan local’. Cu otro palabra, e conseho a tira un pinda pa mantene algun docente contento y kier soña cu un dia Colegio Arubano lo tin un rector local atrobe. Pero por lo tanto, esaki lo keda na soñamento, pasobra e rector nobo tambe lo haya un contract di 5 aña. Consuelo pa pueblo ta, cu e rector aki no lo haya un salario miyonario, manera esunnan prome. Spera cu e nombramento di e rector nobo, lo no bira un otro ripiti y perde atrobe!
Na tur pais cu ta respeta su mes, ta su yiunan di tera ta bini prome. Ta su yiunan di tera cu ta ocupa tur posicion clave den tur entidad publico. Cu hopi entidad publico aki na Arubano ta funciona bon, no pasobra cu tin un falta di yiunan di tera capacita. E falta di e funcionamento bon, ta e resultado di patronage politico unda hende ta wordo nombra politicamente cu no tin e formacion, e capacitacion of e experencia. Pues pa sigui uza e excuus fofo y barata di cu no tin hende di ‘bon calidad’ pa nombra hende di exterior, ta un insulta y un perpetuacion di e engaño publico pa sigui colonisa Aruba. Specialmente den e funcionnan educacional, nos ta di opinion cu esakinan mester wordo guia pa hende local cu conocemento local cu por inspira e hoben, cu nan ta educa, pa pensa cu un dia e tambe por yega pa ocupa e funcion ey of cualkier otro funcion di liderazgo den nos sociedad basa riba su formacion y capacitacion. Cu e gobierno actual ta gusta entrega tur cos y cana na man di tur otro nacionalidad, esey no ta bon y sigur e ta un desaroyo cu no ta wordo comparti pa tur hende. E no por ta cu despues di 30 aña Status Aparte, ainda nos tin cu scucha un presidente di conseho di supervision, cu alabes ta e consehero principal di nos prome minister, declara cu no tin hende di ‘bon calidad’ na Aruba. Ki insulto y ki arogancia. Ki dia pueblo lo core cu e politico tradicional cu a percura of a stroba cu nunca tabatin ‘Nation Building’ despues di Status Aparte. Cuanto mas yiu di tera mester biaha pa studia den exterior, pa despues realisa cu su estudio of opinion no ta bal nada, si e no pertenece na e clase priviligia politico?
Bisa cu nacionalidad no ta conta pa un isla cu ta wordo invadi pa tur sorto di otro nacionalidadnan, cu awendia e ciudadano local ta sinti su mes un ciudadano di tercer clase, ta mustra claramente cu awendia no ta tene cuenta cu e sentimentonan cu ta biba den pueblo. E nacionalidad, ta e alma di un pueblo y sin dje un pueblo no por existi of tin respet pa su mes. E pensamento cu esaki no ta importante of ta conta, ta un pensamento eroneo y no aceptabel. Esaki ta nos humilde opinion!

Comments

comments