Tin hende no ta gusta ora un spiel wordo poni su dilanti, pa asina e mira e realidad. Ni maske cuanto e lo gusta mira algo otro, un spiel no ta gaña y semper e ta revela e berdad. Mirando den un spiel por yuda un hende stop di gaña su mes y acepta e tristo realidad. Awor ban wak kico nos lo mira si nos aplica e sabiduria simpel y practico di para dilanti un spiel riba nos sociedad, uzando e siguiente ehempel.
Durante 30 aña di Status Aparte, Aruba su entradanan nacional a crece cada aña, pero tambe su debe nacional. Awendia Aruba tin un debe di 83% (pues di cada florin, 83 cen ta bay pa paga debe) y e la perde su autonomia financiero na 2014. Si Aruba tabata un compania den sector priva, basta dia e ‘shareholders’ (pueblo) lo a retira e gerentenan (e politiconan responsabel) y lo a pone nan personalmente responsabel pa e mal maneho;
Na 2013, miyones a wordo gasta na ‘Klinkers’ bou pretexto cu decoracion tabata sinonimo cu ‘bon gobernacion’. Na 2014, henter Aruba a wordo confronta brutalmente cu e aventura ‘Klinkers’, a yuda REDOBLA e debe nacional. Y enbes cu e politico tradicional a siña di esaki, awendia atrobe ‘Klinkers’ ta wordo gespart ‘links en rechts’, pa laga un parti di e pueblo mira ‘unda nan placa ta bay’;
Miyones, di cual un parti grandi no tabata presupuesta, a wordo gasta na tur sorto di conferencia ‘Green’, mientras te ainda ningun hende por mira ki beneficio esakinan a trece pa Aruba. Es mas, un bon gerente (mandatario) lo a percura pa di cada un florin gasta, minimal dos ta bini bek. Durante e ultimo 7 añanan, Aruba su ‘Carbon Footprint’ solamente a aumenta cu tanto destruccion di naturaleza, consumo di energia (coriente y gasolin) y e ‘Mehorador’;
No tin tereno mas pa construi cas. P’esey tur plannan pa proteha nos naturaleza y medio ambiente, mester wordo hala un banda pa e gobierno ‘Green’. Y keto bay tur sorto di permiso ta wordo duna pa mas hende establece nan mes akinan y awendia hasta ‘refugiadonan’;
Medida tras di medida a wordo tuma e ultimo 4 añanan, pa asina reduci kisas e debe nacional, cu e politiconan tradicional a crea cu proyectonan di decoracion, te na 40% na aña 2034 (pues 20 aña di medida). Pero un aña prome eleccion, e gobierno cu a percura cu Aruba perde su autonomia financiero, ta bolbe aumenta e debe existente cu algun biyon mas cu e ‘Black Corridor’, ‘Klinkers’, e ‘Mehorador’ y campañadonan. Pues e ta obvio cu e medidanan lo dura mas cu 20 aña y cu nan lo bira mas pisa;
Pa añanan largo, tur hende (incluso e parlamentarionan mes) ta yama nos parlamento un ‘Stempel Parlement’. Asina reconociendo cu nos parlamentarionan tambe ta culpabel di e MEGADEBE, e decadencia di nos sistema democratico y e demas problemanan social. Pues con creibel e ta pa un pueblo consciente kere cu algo lo cambia of mehora, si no cambia e causantenan principal di e desastre;
BAZV a wordo introduci pa cubri e deficitnan di AZV. Pero ainda e gastonan di AZV ta subiendo keto bay. AZV a declara cu e lo tin atrobe un deficit e aña aki. Pues mas medida pa pueblo. E presupuesto 2017 a subi cu mas di 63 miyon, pasobra e cantidad di coordinadornan tambe a subi. Nos minister-president tin mas coordinador (113) cu mayoria departamento gubernamental. E la crea su propio ehercito politico banda di e departamentonan cu ta cay bou di su responsabilidad, y asina mes barco tras di barco ta wordo pega. Pues Aruba su interes ta wordo sirbi asina?
Y asina nos por sigui cu mas ehempel. Awor cu bo persona a termina di completa e ehercicio simpel aki di auto reflexion, ainda bo ta kere cu Aruba ta ‘One Happy Island’? Ainda bo ta kere cu esunnan cu a causa e destruccion di nos isla, mientras cu nan tabata enrikeciendo nan mes, tambe por ta esunnan pa trece solucion y alivio. Ainda bo ta kere cu esunnan cu a gaña y manipula bo persona pa asina tanto tempo, lo por ta capaz pa no haci’e di nobo? Pues haci bo mes e pregunta ‘Cuanto mas mentira, medida, destruccion y entreguismo, bo persona kier sigui acepta’?