Atrobe Aruba (pueblo) a wordo sacudi cu un otro scandal di malversacion di placa. Den e caso aki ta trata Setar. Esaki no ta e prome biaha cu Setar ta wordo confronta cu e practica condenabel aki. Na juli 1998, tambe tabata tin un caso similar (Diario, 16 juli 1998). Loke ta hala atencion den esun aki, ta:
si no tabata pa e ‘Panama Papers Leaks’, e malversacion aki kisas nunca lo a wordo detecta;
a pesar cu tabata tin control, tambe di accountant, segun e relacionista publico di Setar, asina mes pa mas di un decada miyones di dollar por a wordo malversa;
parce cu Setar mester a cuminsa un caso na Merca, pasobra Ministerio Publico ‘no a mira nada den e caso (24ora.com, 21 maart 2017)’.
Mira na ki extremo esun cu a horta a bay, pa sconde su delito. Diferente construccionnan fiscal y legal a wordo uza, pa haci e delito casi imposibel pa detecta. Imagina’bo, Setar tin cu bay te Merca pa purba haya algo bek di su placa bek. Cuanto placa esaki lo costa Setar na gastonan di biahe, investigacion, abogado y corte? No mucho tempo pasa, tambe un abogado mester a biaha te na China, pa haya placa bek di Arubus.
E caso aki no ta uno isola. Den pasado tabata tin varios otro caso di malversacion di placa na entre otro Utilities Aruba, Laboratorio y Directie Onderwijs. Esakinan ta e casonan cu a haya atencion di medionan. Pero tin hopi mas caso cu a keda scondi. Algun hasta a termina den un ‘doofpot’. Pasobra esunnan envolvi tabata tin ‘connections’ of tabata tin informacion valioso riba un ‘niet zomaar iemand’.
E caso lamentabel di Setar, ta mustra pueblo un biaha mas, cuanto corupcion tin ta andando aki na Aruba. Diferente proyecto dudoso y innecesario ta wordo ehecuta, pa sumanan hopi mas halto cu nan balor real. Politiconan cu tambe ta uza diferente construccionnan fiscal y legal pa habri cuentanan bancario y cumpra propiedad den exterior. Nos tur conoce e politiconan cu a drenta cu 10 florin den nan saco, cu nunca a traha den sector priva, pero awendia ta miyonario. Anto e no ta dificil pa imagina, cu algun persona debil lo pensa cu si esunnan cu mester duna e bon ehempel, por enrikece su mes y ‘get away’, cu e tambe por. Ta e mentalidad aki, a trece Aruba unda e ta awendia. Ningun ladronicia ta perfecto. E unico cos cu mester haci ta, ‘follow the money trail’ y bo lo haya esun cu a horta. No ta nada dificil. Solamente mester tin e boluntad pa cuminsa. Aruba no por permiti cu cada dia mas y mas placa ta wordo horta abiertamente, pero depende ken bo ta, algo ta wordo haci. E credibilidad den nos sistema democratico lo disminui, si solamente e ‘small fish’ ta wordo persigui. Pueblo kier mira cu e ‘Afpak team’ di Ministerio Publico, cuminsa investiga politiconan miyonario y nan proyectonan. Ladronicia publico ta un crimen contra humanidad, sociedad y su futuro generacionnan. E cuestion di ‘Monkey see, Monkey do y Monkey steal’, tin cu caba!