Elton Lioe-A-Tjam (ABO): Ainda no ta laat pa scoge pa Aruba. ABO por ta simplemente e diferencia

A pesar cu precies un aña pasa Aruba a perde su autonomia financiero, un parti esencial di su Status Aparte, ainda gobierno, segun Raad van Advies y CAft, ta sigui manipula cu e cifranan financiero. Net manera a pasa den e aña electoral 2012-2013, atrobe gobierno ta gastando biyones manera no tin un fin na ‘klinkers’ y proyectonan cuestionabel, cu tin e solo meta pa sigui gaña un parti di e pueblo cu plannan y proyectonan ta igual na democracia y participacion. Den sector priva, e gerente cu ta privilegia su mes, cu no ta cumpli cu locual e la priminti, cu no ta sirbi e interes di e entidad, cu alabes a manda e entidad bancarota of cu a pone e entidad na rudia pa otronan tum’e over, lo wordo retira ‘per direct en op staande voet’ y hasta poni legalmente responsabel. Dos siman pasa e president di Brazil a wordo baha for di su puesto, pasobra e la manipula cu e cifranan di e presupuesto y asina mal informa parlamento. Pues pa e mesun delito cu a conduci cu awe Aruba a perde su autonomia financiero, un president a wordo baha. Pero aki na Aruba, tur hende ainda ta den nan funcion pa sigui entrega presupuestonan ficticio, pa sconde e malgastamento di placa.
Tur dia mas y mas hende ta haci nan mes e pregunta, dicon mester tin debatenan den parlamento, mientras tur hende por anticipa e resultado di antemano. Debatenan unda nunca e minister ta contesta preguntanan, no ta duna transparencia pero ta prefera di hustifica su mal maneho door di mustra kico tur su opositornan tambe a haci malo durante nan periodo di gobernacion y cu e por haci pio.
E ultimo simannan, pueblo por a tuma nota atrobe con nos politiconan tradicional, no ta scucha pueblo, no ta consulta cu pueblo y ta sigui haci keto bay locual nan kier. Durante e tratamento di e ley riba ‘All-inclusive’ y e debate riba ‘Tereno Gate’, pueblo por a mira esaki claramente. Y sin cu un persona mester ta un ‘clarividente’, e por pronostica e resultado di e debatenan di ‘Eleccion di Presidente di Staten’, ‘Presupuesto ficticio 2017’ y e ‘CITGO-deal’ di 2000 pagina caba. E parlamentarionan di e mesun signatura politico di gobierno lo vota ‘VOOR’ y esunnan den oposicion ‘TEGEN’.
Pero algo straño, remarcabel y unico a sosode siman pasa, durante e tratamento di e ‘Amienda’ cu a wordo entrega prome ‘scondi y sneaky’. Despues di menasa di entrega retiro, al estilo di e Minister di Turismo, tur fraccion den parlamento a haya otro, y e ‘Amienda’ a bira legal. Tambe straño pa scucha con diripiente e politico tradicional kier a lucha pa ‘IGUALIDAD’, mientras cu e mes ta e causante y e promotor principal di ‘DESIGUALIDAD’ cu ta reina den nos sociedad. Mas straño tabata pa mira con e mesun politico tradicional, cu nunca tabata tin oido pa e asunto di ‘ABUSO DI MUCHA’, pero cu awor ‘cueste lo que cueste’ e ‘Amienda’ mester a pasa, diripiente por a haya 1.4 miyon florin pa pone disponibel pa esaki. Pero siendo e politico tradicional, e mester a uza e ‘gesto humanitario’ necesario y urgente aki, pa su propaganda politico. Hopi tristo, repudiabel y bergonsoso. Algo pa pueblo pensa y reflexiona riba dje, pa despues haci e pregunta, dicon bo ta vota semper pa e politico tradicional cu nunca ta scucha, cu semper ta haci locual e kier y cu semper mester tira den bo cara kico e la ‘duna’bo’.
E postura di arogancia y soberbia aki di e politico tradicional, a conduci cu awendia Aruba ta bancarota, ta insigur y no ta di nos mas. Pero parce cu esaki no ta importa e politico tradicional. Pasobra e ta convenci cu e miyones cu semper e la gana riba custia di pueblo, lo permiti’e sigui cumpra voto, organisa campañanan miyonario pa asina e por sigui gaña y manipula pueblo pa no mira e realidad. E pueblo aki no mester di mas mentiranan of ‘plannan di susha wowo’, cu nunca ta wordo ehecuta, controla of pa cual no tin placa pa nan.
A bira tempo pa cuminsa construi un nacion porfin (‘Nation Building’), unda sinceridad, respet, honestidad, dignidad, prosperidad, trankilidad, felicidad, y siguridad ta reina. E unico dos estadistanan grandi cu Aruba a yega di conoce, a demostra cu honestidad, determinacion y amor pa e isla aki, ta e unico ingredientenan necesario pa logra e metanan aki. Tambe nan a mustra cu democracia ta algo di nos tur, pa cual no mester di miyones pa lucha pa bo derechonan y contra inhusticia. Nan a demostra cu ni maske con grandi of sushi e lucha por ta, e berdad semper lo triunfa. Pero mas importante, nan a mustra nos cu nos ta un pueblo digno, culto y sigur no uno cobarde. Pues a pesar cu hopi hende a lubida y hasta algun a reemplasa e balornan di principio aki, pa esunnan di probecho personal y materialismo a costo di su prohimo, nunca ta laat pa haci locual ta necesario y corecto. Ainda por y ABO, por ta simplemente e diferencia!

Comments

comments