Elsa pasando Cuba y a causa tres morto caba den Caribe

Cu tres morto riba su lomba tormenta tropical Elsa, cu tabata e prome horcan di e temporada Atlantico, awe mainta tabata na e area west central di Cuba, prome cu e tuma direccion di Florida.

Ya caba a bati alarma pa e area di The Keys na Florida como tambe pa otro sectornan di e estado di Florida. Ta calcula cu pa awe nochi e lo yega e prome estado Mericano.

E fenomeno natural aki a laga atras basta yobida fuerte na momento cu el a pasa cerca di Jamaica. Awe mainta e tabata na 45 miya noordoost di capital di Jamaica y 145 miya for di Cabo Cruz di Cuba.

Horcan Elsa, forma diahuebs den Atlantico, diabierna a suta Barbados, St. Lucia, Martinique y Sint Vincent & The Grenadines, cu ta forma parti di e islanan Barlovento, den oost di Caribe. Durante su pasada,  tabatin bientonan di rond di 120 km pa ora cu a yega algun rato te na 138 km pa hora, y a causa perdida di coriente y destruccion na structuranan.

Di acuerdo cu medionan local na e paisnan afecta, varios caminda ta blokia y autoridadnan a pidi ciudadanonan pa no subi caya a menos cu e ta pa algo urgente. Elsa a causa tres morto caba diadomingo ora cu e tabata  cerca di Cuba. Un anciano na St. Lucia a wordo haya morto den su cas cu a cay den otro. Na Republica Dominicana tambe tabatin dos morto.  E prome tabata un hoben di 15 aña, di Bahoruco na Barahona, kende a perde su bida ora cu un muraya a cay riba dje a causa di biento fuerte. Den un circunstancianan similar un señora di 75 aña a perde su bida na Baní, provincia Peravia (zuid).

Elsa tabata e prome horcan di e temporada Atlantico y tabata di cinco tormenta tropical cu nomber registra, hopi tempran den e temporada. El a kibra record di Eduardo, cu aña pasa a forma dia 6 di juli.

 

 

Comments

comments