ELMAR cu sumo placer ta anuncia cu nan ta sponsor principal di Casita di Luz Seroe Preto, un di e atraccionnan masha hopi gusta durante fin di aña cu a bira un parti fundamental di e temporada festivo riba nos isla. Esaki ta e di 39 aña di e Casita di Luz, y pa e edicion aki, nan a eligi e tema “Hardin Navideño”.
Tur aña, e famia di Casita di Luz ta transforma e parke na Seroe Preto den un mundo magico di luz, creando un experiencia inolvidabel pa tur bishitante por disfruta. E temporada aki, ELMAR ta enfoca riba e energia cu ta uni nos como comunidad.
“Ban sende, sende luz di prosperidad, ban sende, cu amor pa comunidad, ban sende, un aña nobo ilumina!” E colaboracion di ELMAR cu Casita di Luz Seroe Preto ta refleha ELMAR su compromiso pa sostene proyectonan di comunidad cu ta celebra y preserva nos tradicion y sentido di comunidad.
Casita di Luz Seroe Preto ta habri durante e henter temporada di fin di aña, ofreciendo un espacio unico pa reflexion, celebracion, y conexion. ELMAR ta invita un y tur pa bishita y experiencia e magia di e temporada!
