N.V. ELMAR a presenta un bunita iniciativa e aña aki, esta e proyecto “Elmar Mural Event”. Ta trata aki di un competencia nacional di pintura pa hobennan den dos categoria di edad, entre 6 y 12 aña y entre 13 y 18 aña. E tema cu a scoge ta “Sustainable Aruba” (Aruba Sostenibel). Ya caba a anuncia e 10 ganadonan, scogi door di un hurado. Awor nan ta cabando cu nan trabao ariba e muraya di e cura di e oficina di ELMAR situa na Hato.
E ganadonan a participa na un tayer ofreci door di Robert Tromp, den cual el a inclui temanan basico pa nan obranan, manera entre otro pintamento, tecnica y tipo di pintura. Banda di esaki nan a haya sa mas di e tendencia di pintamento ariba muraya, miho conoci como graffiti.
Cu esaki ta pretende pa implementa den locual a ser produci den forma individual pa e 10 hobennan den e mural, cual lo ta e resultado final. Mas cu claro e tema di “Sustainable Aruba” lo ta central.
N.V. ELMAR ta duna e hobennan e oportunidad di expresa nan talento y creatividad riba un topico asina relevante manera “Sustainable Aruba” pa cual nos compania nacional di distribucion di coriente ta para su tras, pa loke ta e bon practicanan pa haci nos comunidad, comercio y organisacionnan mas consciente riba uzo inteligente di coriente.
N.V. ELMAR ta felicita nos hobennan y ta encurasha nan pa haci nan best y expresa nan creatividad den e forma bunita aki.