N.V.ELMAR ta hopi orguyoso di anuncia su proyecto nobo “Elmar Mural Event”. E proyecto ta consisti di un competencia nacional di pintura cual tin como meta pa motiva e hobennan pa expresa nan creatividad y nan talento a traves di arte. Vision y creatividad di nos hoben artistanan lo ta exponi pa asina duna e comunidad un bista di con nan ta mira un Aruba Sostenibel den forma di arte riba e muraya situa na Elmar Hato.
Cada participante lo haya un tema pa inspira su mes: “Sustainable Aruba” (Aruba Sostenibel). Pa esaki lo tin dos categoria di edad, entre 6 y 12 aña y entre 13 y 18 aña. Nan lo mester haci nan arte durante nan tempo liber.
Un cuerpo di hurado lo husga e resultado final y lo tene cuenta cu diferente aspecto, manera ta originalidad, den e contexto di Aruba Sostenibel. Banda di esaki e pinturanan por ta relaciona aunke no necesariamente cu e topiconan di energia solar, energia renoba, “wave power”, bio-energy of otro fuentenan/tecnologia di energia alternativo, esakinan expresa den un forma artistico.
Pa mas informacion y criterionan pa participa, por bishita e website www.elmar.aw cu tambe lo sigui ofrece tur otro informacion actualisa riba e competencia aki. E dibuhonan mester worde entrega den den un formato di A4/A3 y por entrega esaki na cualkier di e oficinanan di N.V. ELMAR, tanto na San Nicolas, na Oranjestad of esun situa na Hato, prome cu diaranson, 14 di September 2016.
ELMAR lo anuncia e 10 ganadonan kendenan lo wordo invita pa un encuentro cu prensa na fin di September 2016 na unda tambe nan lo ricibi nan premio.
E obra di e ganadonan lo wordo expone ariba e muraya di ELMAR su filiaal na Hato y esaki lo sosode den luna di October proximo, bou supervision di Pintor local Sr. Robert Tromp kende lo ta engarga pa pinta e muraya.
ELMAR no ta solamente un compania cu ta distribui coriente pero tambe ta apoya iniciativa pa haci Aruba 100% sostenibel y ta stimula tipo di proyectonan asina pa logra realisa e meta aki.