Nos hobennan awor tin un oportunidad pa expresa nan creatividad y nan talento pa medio di arte. Esaki ta meta di e iniciativa di N.V. ELMAR cu su proyecto “Elmar Mural Event”.
Ta trata aki di un competencia nacional di pintura pa hobennan den dos categoria di edad, esta entre 6 pa 12 aña y entre 13 pa 18 aña. E tema cu a scoge ta “Sustainable Aruba” (Aruba Sostenibel).
Lo expone e obranan participante den luna di October na Elmar Hato pa asina comunidad henter por aprecia nan talento. E artista local Robert Tromp lo supervisa e trabao aki. Un hurado lo scoge e pinturanan ganado y lo husga aspectonan manera originalidad y e topico central: Aruba Sostenibel.
Pa mas informacion y criterionan pa participa, por bishita e website www.elmar.aw. Mester entrega e pinturanan den un formato di A4/A3 y por entrega esaki na cualkier di e oficinanan di N.V. ELMAR, tanto na San Nicolas, na Oranjestad of esun situa na Hato, prome cu diaranson otro siman dia 14 di september 2016.
N.V. ELMAR lo anuncia e 10 ganadonan durante un encuentro cu prensa na fin di september 2016 na unda tambe nan lo ricibi nan premio. E premionan ta hopi atractivo.
Si abo of bo yiu tin entre 6 y 18 aña nan por participa den e tremendo proyecto di arte aki pa nos hubentud. N.V. ELMAR ta masha orguyoso di ta apoya e bunita iniciativa aki.