Siman pasa N.V. ELMAR a celebra inauguracion di su di shete ‘onderstation’, cual a wordo poni den funcion na Palm Beach. Pa e ocasion aki a invita empleadonan y partnernan strategico pa celebra cu a completa e planeamento, ehecucion, construccion y instalacion di e facilidad nobo di 12KV.
E station aki ta pa cubri henter e bario di Palm Beach, incluyendo e area di hotelnan “highrise” pa asina sigura cu coriente ta yega bon na tur e cas, hotel y negoshinan den e area. Ta un di e stacionnan mas grandi y importante di nos compania nacional di distribucion di coriente.
Ademas di e trabao y inversion grandi realisa pa establece un station nobo na Palm Beach, tin otro stacionnan rond Aruba cu a yega nan fecha pa cuminsa reemplasa nan y poco poco N.V. ELMAR ta invertiendo miyones di florin tur aña den e red di coriente.
E ultimo dos añanan cu a transcuri tabata na turno e bario di Palm Beach y cu inauguracion di e onderstation completamente nobo a logra cumpli cu e meta di e programa di expansion pa e aña aki.
Director di N.V. ELMAR, esta Ing. Robert Henriquez, a laga sa cu nan ta hopi orguyoso di por celebra e “milestone” di logra pone e onderstation nobo den funcion. E districto di Noord y area di hotelnan ta creciendo continuamente y Palm Beach ta un area hopi importante, unda cu awo tin un facilidad confiabel pa cu e parti di energia, segun Henriquez.
Ora referi na un onderstation nobo, ta referi na tur ekipo y sistema nobo, esun di mas moderno den e region aki. E inversion aki ta garantisa cu e red di distribucion ta mas confiabel y ta distribui coriente na un forma mas eficiente, mas lihe y mas sigur. Den esaki mester bisa cu Aruba ta canando dilanti compara cu islanan den region, den tecnologia moderno den companianan di utilidad.