Elliott Loonstra PLY a participa na e di tres ‘Para Pan Am Series’ na Sao Paulo, Brazil dia 15 di september 2022. E evento a tuma lugar na e ‘Centro Deportivo Paralimpico Brasileiro’ y tabata tin participacion di 11 pais di e regionnan Pan Am, Europa y Asia. E evento aki tabata exitoso pa Elliott Loonstra PLY como cu el a gana e medaya di brons.
Loonstra su prome pelea tabata contra di Colombia y di un principio e tabata tin bentaha. E pelea e termina na fabor di e team di Aruba asina hibando nan pa e semi final contra di Brazil. E pelea semi final contra e Brasilero a cuminsa cu Elliott Loonstra PLY na bentaha pero na final a termina na favor di e Brasilero cu ultimadamente a bira campeon di e competencia. Elliott Loonstra PLY a logra yega podio den e competencia aki, haciendo esaki su di dos medalla di brons pa e aña aki.
Cu e resultado aki, Elliott Loonstra PLY su ranking mundial ta mehora y e ta posiciona su mes for di 10 pa di 7 lugar poniendo e den un bon posicion pa e competencianan otro aña na Santiago, Chile. E siguiente competencia pa Elliott Loonstra PLY y su team lo ta na e ‘World Para Grand Prix’ cu lo tuma lugar na Manchester, Inglatera na oktober benidero. Elliott Loonstra PLY a wordo invita pa e equipo nacional Mexicano di Para Taekwondo pa entrena hunto cu nan na CNAR (Centro de Alto Rendimiento) na Mexico. Pronto Elliott Loonstra y su coach Luciano Mazzeo lo ta biahando cu speransa di por logra podio na Manchester, Inglatera.
Elliott Loonstra PLY kier duna reconocimiento na su famia, CEMEDAR (Centro Medico Deportivo Aruba), BodyZone Fitness y Roro Fitness pa e apoyo duna na dje durante di su preparacion.
