CARACAS- E ekipo periodistico di Univision Noticias, lidera pa Jorge Ramos, diamars a wordo deporta despues di a wordo reteni pa mas di tres hora den Palacio di Miraflores riba orden di Nicolas Maduro.
Segun e periodista, Maduro no a gusta e preguntanan y a duna ordo pa tuma e material graba den beslag, e ekipo y obhetonan personal, ademas a duna orden pa su detencion.
“Loke mi a bisa Nicolas Maduro ta cu miyones di Venezolano y hopi gobierno di mundo no ta considera e presidente legitimo sino di un dictador. Esey mi a bisa Nicolas Maduro, cual mas cu claro, e no a gusta y p’esey el a para e entrevista”, Ramos a agrega.
Enrique Acevedo, otro periodista di Univision, a bisa cu Ramos a mustra Maduro e video di algun hoben comiendo di un truck di sushi y a bisando cu “tin cu wordo saca for di poder”.
“Mi ta come for di bari di sushi, pa prome biaha den mi bida.. Presidente, despensami, pero abo no ta sirbi como president”, un homber identifica como Jesus ta bisa den e video. Acevedo a share e video aki riba su cuenta di Twitter.
E material di e entrevista di Ramos a wordo confisca pa e forsanan di siguridad di e regimen, e periodista aki a bisa den declaracionnan na e cadena Hispano despues di a sali di e palacio presidencial,
No ta prome biaha cu periodistanan ta wordo deteni na Venezuela, ya cu na januari varios detencion di miembronan di prensa a keda registra, incluyendo cuatro di EFE.
Segun e sindicato di Prensa, na januari so a conta 40 agresion di parti di forsanan di siguridad di estado contra di trahadonan di prensa.
Maduro a acepta e entrevista cu Ramos siman pasa y finalmente esaki a tuma luga dialuna atardi. Dado momento durante e entrevista, Ramos a mustra Maduro un video unda cu por wak varios Venezolano comiendo resto di cuminda for di un truck di sushi y esaki a incomoda Maduro. E ora nan a duna ordo pa no laga e material graba te cu e ora ey for di Palacio di Miraflores.
E periodistanan di Univision a wordo escolta pa Aeropuerto di Maiquetia door di personal di Embahadanan di Mexico y Merca.