MOSUL, Irak – Forsanan Iraki a recupera diamars e control di e edificio di television oficial di e ciudad di Mosul, situa na final di e bario oriental di Kukyeli, e porta na e plaza fuerte di e grupo Yihadista denomina Estado Islamico (EI) na Irak.
E hefe di e operacionnan conhunto Iraki, teniente coronel Taleb Shagati, a bisa algun periodista na e base di Bartala cu “recupera e television di Mosul ta nifica recupera e ciudad.”
Shagati a indica cu e enfrentamentonan cu e extremistanan ainda ta sigui den e zona, pero cu e tropanan ya ta aproxima e siguiente bario di e ciudad desde e frente oriental.
Atake riba ISIS
E forsanan Iraki a logra drenta den e ciudad di Mosul via e frente oriental, unda nan a libra combate cu e Yihadistanan di e grupo denomina Estado Islamico (EI) den e bario di Kukyeli, un comandante di alto rango a informa diamars.
Hefe di e forsanan antiterorista Iraki, Abdelgani al Asadi, a bisa EFE cu su tropanan a libera den algun ora un parti di Kukyeli, considera e porta pa Mosul y cu tin e bario rondona.
Al Asidi ta calcula cu Kukyeli por a wordo recupera for di e Yihadistanan por completo den e hornada aki, aunke tambe a indica cu pa su gran tamaño, e operacionnan por rekeri “mas tempo.”
E tropanan Iraki a recupera ayera e control di Basauia, tambe den e frente oriental, y a haci avance na Kukyeli, situa 900 meter di e entrada di Mosul.
Mas of menos 250 habitante di Bazauia a sali diamars for di e zona y ta wordo transporta pa campo di refugiadonan, segun cu e agencia internacional di noticia EFE por a constata.
E hefe di e operacionnan conhunto Iraki, Taleb Shagati, ya a delanta ayera cu e recuperacion na Mosul por tuma luga “den e proximo oranan” y cu e liberacion di e ciudad lo tuma luga “pronto.”
Anochi, e prome minister Iraki, Haidar al Abadi, a sigura cu e Ehercito Iraki ta “hopi cerca” di e ciudad di Mosul y cu EI solamente tin e opcion di “rindi of muri.”
E gran ofensiva pa kita Mosul for di EI a pasa dia 17 y desde e tempo ey, forsanan Iraki hunto cu e “peshmerganan” Kurdo, a bay ta avansa sin pauze, den e frentenan oost, noord y zuid.
E frente west a wordo habri tres dia pasa pa milicianan progubernamental Chiita Multitud Popular, cu a despleta den e zona cu 15 mil persona.
Mosul ta e principal bastion na Irak di EI, cu a conkista e ciudad na Juni di 2014, ora cu tambe a autoproclama un califato den e teritorionan bao di nan control di e pais aki y di esun bisiña, Siria.
Fuente: NTN24