Hefe suplente di Biblioteca Nacional Aruba, Sra. Lilian Semeleer, a ricibi un ehemplar di ‘Tooby i porkeria den Mondi’ for di sr. Bas Jussen y directora di Directie Onderwijs, sra. Anna Maria Proveyer-Groot. Esaki ta un pelicula anima y e ta e proyecto principal di Foundation Tooby.
E produccion ta inspira mucha pa ta consciente di e balor di nos medio ambiente pa medio di e personahe principal Tooby, un macaco, y su amigonan. Esaki ta un produccion gratis pa scolnan. Tur scol basico di Aruba lo ricibi un ehemplar. E produccion ta bini for di Corsou y fundador di Foundation Tooby ta Willemijn Jussen. E ehemplar lo bay pa seccion Arubiana di Biblioteca Nacional Aruba.