CARACAS – Ministerio Publico di Venezuela a anuncia cu e ta investigando e directivonan (nobo) di e filial petrolero Venezolano PDVSA na Merca, CITGO y na e embahadornan designa pa parlamento di mayoria opositor.
“Nos a cuminsa un investigacon di e ciudadanonan nombra inconstitucionalmente como directivonan di PDVSA y di CITGO, pa un usurpador di poder”, fiscal general Chavista, Tarek William Saab.
E funcionario a recorda cu Ministerio Publico lo inicia “un serie di investigacionnan” ante un “escalamento cu a cuminsa cu e usurpacion iritabel di e presidencia di e republica”, despues di e “autoproclamacion” di Guaido “riba un plaza” dia 23 di januari.
E investigacion ta inclui tambe “embahadornan fantasma” designa di “forma ilegal” pa parlamento, di mayoria opositor, segun e fiscal.
Saab a señala cu nan ta complice di un conspiracion “contra di paz ciudadano” y a adverti cu lo tin “consecuencianan legal” pa esunnan cu acepta e nombramiento, como tambe pa Guaido.
E Asamblea Nacional a nombra representantenan diplomatico den un decena di paisnan cu a reconoce Guaido, entre cual Merca.
Diaranson Guaido a anuncia un hunta directiva nobo pa CITGO, den su estrategia di horca e regimen di Maduro economicamente, hunto cu presidente Donald Trump, despues di cu e Parlamento a declara e “usurpacion” di e presidencia.
Parlamento a aputna Luisa Palacios, Angel Olmeta, Edgar Rincon, Luis Urdaneta, Andres Padilla y Rick Esser, sin duna mas detaye di kico lo pasa cu e actual ehecutivonan di CITGO nombra pa Maduro.
“E cos aki ta un circo cu tin como meta trapa ariba nos constitucion”, e fiscal Venezolano a remarca, cu ya dia 29 di januari a anuncia un investigacion contra di Guaido ora cu acusa e Presidente di Parlamento di promove hechonan cu ta altera e paz.
Di otro banda, e Sala COnstitucional di e Tribunal Supremo di Venezuela a declara nulo e designacion di e hunta di directiva nobo di CITGO y PDVSA.
Entre tanto, Juan Jose Mendoza a lesa un sentencia unda cu e ta señala cu Parlamento a aproba un acuerdo ilegal pa nombra e hunta di directiva di ambos compania petrolero y a dicta un serie di medidanan pa esunnan nombra door di Guaido, cu ta inclui e prohibicion di salida di e pais y confisacion di nan bienes.
Guaido tambe tin prohibicion di salida for di e pais riba orden di e Tribunal Supremo di Husiticia y e Controlaria General ta investigando su patrimonio pa supuesto financiamento externo.
Merca a congela cuenta y activonan Venezolano, cual control el a entrega na Guaido, y desde 28 di april lo pone beslag ariba e exportacion di crudo Venezolano mas importante pa su mercado. Caracas ta calcula cu e daño na su economia pa e blokeo Mericano lo ta na 30 biyon dollar.