E cifra di AO den sector priva na Aruba, ta bao di e normanan internacional. Aña pasa e tabata bao di 3 porciento. E ultimo 10 pa 15 añanan, e ta bao di 3 porciento promedio. Lo tin sectornan caminda cu e ta mas halto cu otronan, pero ta depende di diferente factor. Edad ta hunga un rol, tipo di trabao ta hunga un rol. Por imagina un trabao mas biaha den oficina caminda no tin mucho trabao fisico, sino mental cu eynan e cifra di AO ta mas abao. Solamente si tin un sector cu fisicamente ta exigi mas di e trahado, por tin mas chens cu e persona ta AO mas hopi.
E sectornan caminda cu tin mas contacto cu publico, sector turistico tin biaha ta expone hopi mas na malesanan contagiioso, maner Griep, etc. Esey por pone cu den e sector e AO ta mas halto cu e otro sector, pero tum’e den su general e pais, e sector priva di e pais, ta bao di tres porciento cual ta bao e normanan internacional, segun Edwin Jacobs, director di SVB.
A constata si cu durante e ultimo tres lunanan cu e grupo a wordo habri, e seguro a wordo habri pa esnan cu door di aumento di e premie loongrens, cu e grupo ey ta sinti cu tabata tin un necesidad cu tabata tin un grupo di den un forma of otro, prome cu no tabata tin e proteccion aki, ta mira si cu e grupo a haya un aumento den su gastonan. Te awor aki e ta un aumento cu tin’e premira den calculonan tambe. Pero SVB ta sigui monitor di cerca pa wak kico ta e desaroyo.
Wachtkamer
Locual si tin cu bisa ta cu awor aki e wachtkamer di SVB ta chikito. Tin cu tene cuenta cu e edificio a keda cla na aña 1981 y no ta suficiente. Awor aki ta den proceso pa haya un pida tereno tras di e edificio di SVB y lo elimina e trailernan cu a wordo poni mas di binti aña pasa y pa otro aña lo kier pone un parti patras di e edificio na Eagle, caminda cu lo reubica esnan cu ta den e trailernan den e edificio y ta bay traha dos wachtkamer mas cerca y dos camber di control mas pa dokter cerca. Ta den e proceso pa busca dokter pa por amplia e servicio. A caba di contrata dos dokter Arubiano cu a studia den e region, pero tin mester di mas. Ta bay ta trahando riba esaki, solamente cu eseynan ta riba termino medio cu por mira e efectonan.
Mientras tanto riba termino cortico, ta keda cu e wachtkamernan yen, apesar cu tin cu bisa cu a bay cu un sistema awor aki y ta bay sigui profundis’e, caminda ora cu e persona ora e yega SVB e haya su number. Riba e formulario cu ta haya e number pa tal camber, ta poni tambe ki ora ta sper’e den e wachtkamer. Asina aki ta purba di controla y no laga e wachtkamer yena. Eynan tambe falta pa informa e clientenan. Hopi biaha nan no ta conciente di loke tin skirbi riba e number cu nan ta haya, segun Jacobs.