Manera partido Union Patriotico Progresista, UPP, a bin ta anticipando, den e dianan aki nos lo ta poniendo atencion riba puntonan di nos programa di gobernacion, pa e eleccion venidero. Desde fundacion di partido UPP, nos a bin ta hiba un sistema di difusion di nos principio y idealnan. UPP na 2012 a produci un manifiesto, cu a sirbi pa nos Programa di Partido y Puntonan di Accion cu nos a mira necesario pa e gobernacion 2013 – 2017. Apesar cu e programa di UPP e tempo ey tabata uno amplio, cu solucionnan viabel pa nos problemanan den y di gobernacion, UPP a mira tres punto como puntonan esencial cu mester atencion. Esakinan tabata (y ta!) “Good Governance”, Educacion y Arubianisacion. Pa e eleccion venidero sigur UPP ta mira cu Seguridad lo ta un di cuatro cu nos ta agrega. Esakinan nos ta yama e “speerpunten” di nos campaña y nos programa.
Den nos prome articulo nos a enfoca riba e aspecto di “Good Governance” cu UPP ta kere ta un instrumento concreto y real pa soluciona nos problemanan den gobernacion. Solucionando esakinan, nos ta habri caminda tambe pa atende problemanan riba otro areanan di gobernacion cu tambe ta afectando nos comunidad en general. Reglanan di bon gobernacion lo mester conta tanto riba nivel gubernamental, di partidonan politico y tambe pa e sector priva. Reglanan di bon gobernacion mester duna e ciudadano e satisfaccion cu nos patrimonio nacional, nos fondonan publico, nos derechonan como individuo y participacion democratico ta wordo garantisa.
EDUCACION ESENCIAL DEN OFRECE OPORTUNIDAD Y CREA UN COMUNIDAD SANO
Pa UPP educacion of enseñansa ta un di e aspectonan mas importante, un di e hermentnan mas poderoso den e desaroyo di un comunidad. UPP desde su fundacion a mustra bon cla cu nos enseñansa mester ta uno cu ta duna tur oportunidad na nos ciudadanonan pa desaroya nan mes. Nos educacion ta cuminsa for di momento nos nace, te na momento cu nos Creador tuma nos den su Reino. Ta un proceso continuo, na unda cu educacion no ta algo di solamente un instituto, esta scol, sino di henter un comunidad. Cuminsando cu mayornan, famia, scol y maestronan, comunidad y organisacionnan social y deportivo, iglesianan y trabou. Y naturalmente gobierno y parlamento.
UPP su punto di salida ta cu nos mester di un enseñansa di INCLUSION y no di EXCLUSION, manera ta existi awor aki. Nos sistema educacional, cu mas bien ta uno di competencia y di calificacion di hende, no ta contribui na un desaroyo estable y equitativo. Tambe nos sistema educacional mester ta uno unda cu e mucha ta central. Reconociendo cu e base di educacion di un mucha ta su idioma materno, ta nifica cu Papiamento mester haya un rol central den e prome añanan di nos curiculo escolar. Ya caba pa decadanan e opresion di esaki den nos comunidad, ta pone nos mesun hendenan sinti cu nos Papiamento ta inferior, mientras cu nos ta crea un sistema educacional cu ta crea robotnan, mientras cu esnan cu mihor afinidad di idioma straño ta haya mas oportunidad den bida pa sigui studia y sigui progresa.
Pesey UPP ta na fabor di cu Papiamento na prome instante ta bira idioma di instruccion na scolnan y cu despues poco ta bay over na pone nos otro idiomanan, manera Hulandes, Ingles y Spaño como parti di nos curiculo. Esaki tambe fomentando e sistema di scolnan multilingual.
Banda di e aspectonan aki, UPP ta mira tambe como esencial un transformacion di nos sistema educacional basa riba pensamentonan moderno, manera ta existi den e paisnan Nordico, manera p.e. Finlandia. Un sistema hopi mas progresivo cu ta na bienestar di e mucha, di e studiante, pero cu ta duna su fruto bek na e mesun comunidad.
Den henter e concepto aki ta importante pa menciona, cu banda di ta siña aspectonan metodico necesario di bida, ta importante tambe pa traha na aspectonan creativo di nos hendenan. Esaki pa riba tur nivel contribui cu e desaroyo intelectual y personal di cada un mucha. Al final nos mester crea ciudadanonan critico cu por pensa pa nan mes, ciudadanonan cu ta funciona a base di e pensamento di “Good Citizenship”, asina creando e felicidad necesario pa henter nos comunidad.
UPP ta propaga cu nos enseñansa mester ta uno completamente liber, incluso pa loke ta nos scolnan secundario y avansa. Esaki naturalmente pa nos hendenan, ciudadanonan di e Pais aki y cu ta residencia na Aruba. Pesey tambe UPP a opta pa crea un fondo nacional di enseñansa cu mester wordo furni di fondonan cu ta bini di e.o. actividad explotacion di petroleo of gas den futuro, pero tambe por medio di entradanan cu lo mester surgi for di companianan Arubiano cu ta riba e tereno di rafinamento di petroleo. Asina UPP ta na fabor pa p.e. e transhipment keda den man di Gobierno, mescos cu esun di distribucion di combustibel, pa di e forma ey e ganashinan por bay pa un fondo asina.
Den e proximo articulonan UPP lo bay mas den detaye riba e punto aki di nos Educacion, unda nos lo amplia riba puntonan concreto pa loke ta nos enseñansa. Educacion y enseñansa ta fundeshi di un pais, y aki ta unda nos prioridadnan mester ta hinca. UPP ta convenci di tin un programa hopi realistico y cu na su turno no mester costa hopi placa, pero si e boluntad y determinacion di tur cu ta desea e cambionan tan desea aki na Aruba.