Recientemente Parlamentario Kelly a atende reunion di Parlatino caminda cu un di e temanan tabata “Cultura de la paz en los colegios”. A atende diferente tipo di violencia cu ta tuma luga na scol y rond di scolnan den Caribe y Latino America. Pa e motibo aki e comision di educacion di Parlatino a pone e tema aki riba agenda pa ser trata den reunion di comision y a trece dilanti e concepto pa promociona e asina yama “Cultura di pas na scolnan”
Cultura di pas
Cultura di pas ta caminda cu e hoben ta wordo educa “desde la cuna” manera cu nan ta yam’e, o sea ta inculca desde crèche of kleuterschool caba ideanan y pensamentonan di anti violencia. Meta ta pa e hobennan compronde kico ta violencia y kico e consecuencianan di esaki por ta. Ta sumamente importante pa hunto nos duna un man pa lanta un comunidad mas responsabel y consciente di e consecuencianan cu violencia por trece cun’e. Parlamentario Kelly ta corda cu recientemente na Aruba tabatin un caso lamentabel caminda cu un maestro a wordo agredi. Hunto nos mester percura pa esaki no sosode nunca mas. Un di e formanan pa haci esaki ta dor di papia di e tema y discuti esaki na un manera sano pa asina hunto nos bin cu solucionnan pa preveni e tipo di casonan aki.
Responsablidad ta den man di nos tur
Parlamentario Kelly ta splica cu e ta contento di mira cu na Aruba ya diferente iniciativanan a wordo presenta, entre otro e “gedragscode” pa mayor, maestro y alumnonan, programanan di “anti bullying” y tambe ta ofrece servicio di telefon pa hubentud na nos hobennan. Pero e Parlamentario ta enfatisa cu hunto nos mester duna un man si nos kier mira cambio. Pa cuminsa educacion di un mucha ta cuminsa na cas y esaki ta primordialmente tarea y responsabilidad di e mayornan. Pero e rol di e maestro den klas ta esencial. A base di su comportacion y loke e ta transmiti na e hobennan. A base di idea y pensamentonan cu e maestro ta trece dilanti den e proceso di educacion di e hoben. Hunto, mayornan, maestronan y henter nos comunidad nos mester contribui na educacion y formacion di nos siguiente generacion. Si nos kier crea un sociedad di anti violencia, responsabel y mas consciente di e importancia di e bienestar y progreso di nos pais ta hunto nos mester haci’e. Cada un di nos mester asumi nos rol den sociedad, como mayor, maestro/educador, medionan di comunicacion y politico. Si nos kier trece cambionan positivo den nos comunidad y forma un generacion sano, nos mester cuminsa cu nos mes.