Eduard Maduro di SADA: Unabes bo a autoridad para na frontera bo mester wordo respeta
Durante un conferencia di prensa yama pa Sindicato di Aduana Eduard Maduro, kende ta e presidente, a splica mas di e desaroyonan cu ta bayendo for di man den e departamento y e miembronan di Aduana.
Desde aña pasa tabata tin problema na Barcadera, caminda cu Astec ta impone cierto reglanan, cual e coleganan no a acepta y SADA a back nan up, pasobra nan ta di e mesun pensamento cu unabes cu bo ta autoridad para na frontera, bo mester wordo respeta.
Manera cu a elabora extensamente riba esaki, no por ta asina cu cuerpo di siguridad priva, cu no sa ki background nan tin, ta bin haci control riba Douane.
A scucha e director cu no ta trata di un control, djis pa haci un headcount, etc. Ora cu haci e reglamentonan di cas di Astec, esakinan ta un di nan cu ta hinca den e reglanan.
E director a bisa tambe cu si mañan mester bay ristra un colega of auto di douane, E ora algo otro ta bay sosode. Ta kere cu e director no a compronde e reglamentonan di Astec den su totalidad. Pasobra un di nan ta bahamento for di auto y e otro ta e control, cu awor aki ainda nan no ta haciend’e supuetamente segun e director, tampoco no ta cuadra.
Tin di compronde for di coleganan cu nan ta wordo controla ora di drenta, nan tas ta wordo controla. Pa e banda ey si e director ta mas cu su cuerpo y ta busca e informacion corecto, e lo haya sa cu esey ta sosodiendo.
Ta lamenta tambe cu ora cu ta pone e ambtenaar baha for di auto y den otro manera ta wak un bus yena cu bishitante di waf, ta cana kibra y ningun hende ta wordo baha for di bus, e coleganan a manda video di esaki, pasobra hasta esey nan a haci, saca potret, unda cu ta mira claramente un bus carga cu hende ta drenta waf na Barcadera. Ningun hende ta baha nan for di bus pa control. Pero ora cu e ambtenaar bin pa haci su trabao di control y asina yuda cuida Aruba su frontera, si ta wordo baha for di auto y esey ta cosnan cu ta bisa cu e director mester involucra su mes mas cu e coleganan y menos por ehempel cu leiding di Astec of e chefnan cu ta permiti esaki sosode.