Internacional: Ex candidato presidencial di oposicion Venezolano Edmundo González Urrutia a bisa diabierna cu e ta preparando e condicionnan pa regresa su pais y pone un fin na e gobierno di Nicolas Maduro, cu el a califica como un “tragedia.”
“Pronto, hopi pronto, sin importa kico nan haci, nos lo por drenta Venezuela y pone un fin na e tragedia aki,” González Urrutia a bisa den un mensahe di video, divulga algun ora despues cu Maduro — na poder desde 2013 — a huramenta. pa un di tres periodo.
González Urrutia, a bisa cu el a gana e eleccion di dia 28 di juli, a declara su mes presidente elegi di Venezuela y a bisa cu Maduro “a viola e Constitucion y e boluntad soberano di e pueblo Venezolano”, acusacionnan cu e mandatario a rechasa anteriormente.
Di su banda, González Urrutia a bisa cu e ta “hopi cerca di Venezuela” y “cla pa entrada sigur.”
“Na e momento corecto, lo mi afirma e votonan cu ta representa e recuperacion di nos democracia. Nos ta coordinando tur e factornan necesario pa garantisa un pronto regreso na libertad”, el a bisa.
Momentonan prome, den un otro mensahe di video, e lider di oposicion Venezolano, María Corina Machado, a bisa cu el a pidi González Urrutia pa no purba drenta e pais diabierna awor, manera planea, pa no pone su seguridad na peliger.