Internacional: Lider di oposicion Venezolano Edmundo González a reuni Dialuna awor na Washington cu e Presidente di Merca, Joe Biden.Na final di e reunion, cu a tuma luga na “White House”, González a bisa cu e reunion tabata “largo y fructifero.” “Nos ta aprecia e apoyo cu Gobierno di Merca a duna nos den e lucha aki pa recuperacion democratico di Venezuela. Esey ta un compromiso cu nos tin,” González a bisa den declaracionnan cortico na prensa.
Despues, riba medionan social el a sigura cu e compromiso di Biden “pa un transicion pacifico y ordena na Venezuela ta intacto.” E lider di oposicion Venezolano a agrega cu su ekipo ta mantene contacto constante cu e ekipo di Donald Trump, cu lo asumi e Presidencia di Merca dia 20 di Januari proximo.
E no a detaya si lo tin un reunion formal cu e presidente eligi. Ministerio Venezolano di Relacionnan Exterior a critica den un comunicado e “intervencionismo di e Gobierno saliente di Joe Biden” despues di e encuentro entre e Presidente Mericano y e contrincante Venezolano.
Aña pasa, Merca a reconoce González formalmente como e Presidente eligi di e pais, despues di e eleccionnan controversial di dia 28 di Juli. González a cuminsa un gira internacional di Sur America e fin di siman aki, mientras cu Venezuela ta prepara pa inicio di un periodo nobo di Gobernacion.
Diasabra, González a reuni cu e Presidente di Argentina, Javier Milei, na Casa Rosada, na Buenos Aires. Na Argentina, el a confirma cu el a plania un reunion cu Biden y cu nan tabata warda riba “definicionnan tocante e autoridadnan nobo.” Despues, el a topa na Montevideo cu e Presidente di Uruguay, Luis Lacalle Pou.
Tanto González como Presidente Nicolás Maduro ta bisa cu nan a gana e eleccion Presidencial di 28 di July y lo tuma nan funcion dia 10 di Januari. E Conseho Nacional Electoral (CNE), cu ta obedece Chavismo, a proclama Maduro e ganador, pero González, e oposicion mayoritario y algun Gobierno no ta na altura di e resultadonan ey.