Desde Diaranson siman pasa e noticia a bira conoci cu cantante Edjean Semeleer lo presenta su magno proyecto “Hey… ta Pasco!” un bes mas den 2019 como parti di su celebracion di 25 aña den e mundo di musica y entretenimento.
Manera cu el a anuncia, e aña aki e proyecto ta ensera varios presentacion musical special na e casnan di nos grandinan riba Aruba, tambe un concierto di Pasco regalo na alumnonan y maestronan di Maria School y Colegio San Hose e mainta di 19 di december y pa clausura, e gran concierto “Hey… ta Pasco!” den e anfiteatro historico di Ser’i Noka cu lo wordo presenta e anochi di dia 19 pa publico en general.
“Hey… ta Pasco!” a bira un di e expresionnan mas usa riba nos isla desde aña 2003 cu Edjean a introduci un album musical conteniendo cancionnan di fin di aña.
E proyecto aki a crece aun mas na aña 2006 ora cu e album musical a wordo compaña pa un concierto di Pasco cu tabata un exito rotundo.
Hopi liher e concierto “Hey… ta Pasco!” a bira e concierto di fin di aña mas spera y gusta di tur tempo y asina a sigui un serie di conciertonan di fin di aña exitoso y “sold-out”.
Despues cu “Hey… ta Pasco!” tabata ausente pa 5 aña y pa complace cu e demanda grandi, Edjean a dicidi di regresa cu e proyecto aki den 2019 y na un localidad hopi gusta pa nos hendenan, cu ta e teatro di Ser’i Noka.
Manera ya ta conoci, e teatro di Ser’i Noka ta den un luz masha positivo ultimo tempo pa e motibo di e anuncio di Fundacion Go Cultura y tambe Parokia di Santa Cruz, cu a uni pa asina cuminsa cu e trabaonan di restauracion y renobacion di dicho teatro.
Proyectonan positivo manera “Hey… ta Pasco!”, ta contribui na e esfuerzo y hazaña di recauda fondo pa por continua cu e trabaonan importante di rescate di e anfiteatro aki cu ta nos herencia cultural y tambe nos patrimonio nacional.
Empresanan local manera Setar, Super Food Plaza, Aruba Bank, Aruba Tourism Authority, High Performance Sound & Lighting, Chocoglam, Fantastic Gardens, Subway y entidadnan internacional manera OASCA y nos ciudad ruman Doral na Florida ta mira hopi balor agrega den proyectonan creativo y cultural asina cu ta aporta na un desaroyo positivo y sostenibel di nos pais.
Pesey tambe nan tur ta invita bo pa bo demostra apoyo cu bo presencia dia 19 di december proximo den e teatro di Ser’i Noka pa disfruta di e gran concierto “Hey… ta Pasco!” presenta pa Edjean Semeleer y un elenco fantastico di artista.
Carchinan ta obtenibel na oficina di Go Cultura na J.G. Emanstraat 24, Fantastic Gardens y tambe na Chocoglam na Boegoroei.
Tambe por reserva yamando 5830808.
Percura pa bo tambe tey den Ser’i Noka diahuebs 19 di december pa celebra cu Edjean su 25 aña den musica y disfruta di e gran concierto “Hey… ta Pasco!”