Awe pa 2.15 di merdia Parlamento no. 11 a reuni pa prome biaha. E reunion aki a wordo guia door di drs. Mervin Wyatt Ras, como e parlamentario di mas bieu den e organo, mirando cu no tin un coalicion ainda.
E dos candidatonan cu tabata postula presidente tabata drs. Marisol Lopez Tromp (MAS) y mr. Edgar Vrolijk (MEP).
E comision cu a presidi e votacion, tabata consisti di tres dama: mr. Evelyna Wever Croes; mr. Gerlien Croes y drs. Marisol Lopez Tromp.
E votacion tabata bay hopi pareu, unda cu Marisol a haya voto di su partido y di fraccion di AVP. Pero dos Parlamentario di Raiz a voto pa e candidato di MEP pa cual el a bira e presidente di Parlamento no. 11.
Mester manda dos nomber pa Gobernador pa loke ta presidente y vice presidente. Den e votacion pa e di dos opcion pa presidente e nombernan tabata Hendrik Tevreden, Miguel Mansur, Ursell Arends y Gerlien Croes. E di dos nomber cu lo manda pa Gobernador ta Hendrik Tevreden, kende a haya 9 voto di e 20 parlamentarionan presente.
Pa loke ta vice presidencia e dosnan scogi tabata: Ursell Arends y Geoffrey Wever, ambos di partido Raiz.
Na final tabatin un papel di mas, esta 21 voto pero tabatin 20 parlamentario huramenta y presente. E papel di mas tabata un voto pa nomber di Benny Sevinger.